NCTVI: Emailnan fraudulento supuestamente di gobierno ta circulando rond

ORANJESTAD  – Tin serie di email fraudulento den circulacion pretendiendo di ta di departamentonan di gobierno, conteniendo informacion falso y engañoso. Asina e oficina nacional central di contraterorism y seguridad y Interpol (NCTVI) a informa Noticiacla recientemente. Riba pregunta specifico di e portal aki, e oficina a confirma cu ta trata di emailnan falso di supuesto departamentonan di gobierno di Aruba. 

PUNTONAN CRUCIAL

Segun e oficina, tin varios punto pa tene cuenta cune. Entre nan e origen falso. E emailnan aki ta pretende di origina di oficialnan di gobierno, y ta parti di un schema fraudulente cu intencion pa engaña e recipiente di e email. “Nos ta reitera cu e comunicacion aki di ningun manera ta manda di ningun oficial di gobierno” e oficina a sigura e portal aki. 

DELETE E MAIL

A conseha pa asina haya un tipo di email asina, pa no dune atencion y of delete esaki mesora. “Nos ta urgi cualkier persona cu ricibi un mail sospechoso asina, supuestamente di un oficial di gobierno, pa deshaci di esaki  completamente y no actua riba e contenido di e mail. Door di delete esaki mesora, ta un paso crucial pa salvaguardia bo informacion personal”. Tambe ta pidi pa raporta cualkier incidente similar. “Nos ta pidi cualkier persona cu a ricibi un email asina, den futuro pa raporta esaki na autoridadnan relevante manera polis”. Tambe finalmente ta pidi pa confia solamente canalnan oficial di informacion di custumber, y esaki ta inclui e paginanan social, website oficial y of contacto provee pa fuentenan confiabel. Pa cualkier pregunta, por manda email pa frontoffice@nctvi.aw.