Corte na Corsou: Specialistanan di CMC tambe ta cay bou di LNT

WILLEMSTAD – Specialistanan cu ta traha na Curacao Medical Center (Hospital di Corsou) tambe ta cay bou di e ley cu ta regula salarionan maximo, osea e Landsverordening Normering Topinkomens Curacao (LNT). Asina Corte a dicta diaranson na Corsou, den un caso cu e specialistanan a entama contra gobierno di Corsou. E pregunta cardinal tabata si e specialistanan tambe tabata cay den e alcanse di e ley, y esey a wordo confirma pa medio di e sentencia aki.  

CMC

CMC segun e resumen di nan defensa, ta sigura cu nan no ta cay bou di e alcanse di e ley en cuestion. Asina leu cu esaki si ta  e caso, e ora e parti ey di e LNT ta contra e normanan superior  y por lo tanto no valido. Of por lo menos e LNT mester wordo declara no amplicable pa e parti aki di e specialistanan.   Tambe, e specialistanan ta argumenta cu si e specialistanan ta cay bou di LNT, esaki ta empugna cu principio general di bon gobernacion, cu tambe mester wordo exclui. Y finalmente CMC ta argumenta cu si mantene e regla asina, e por tin consecuencia serio pa CMC y e cuido medico di Corsou, y a base di e evaluacion di interes,, no ta responsabel. Por lo menos no, tanten cu no tin un sentencia den un caso di profundidad (bodemprocedure). 

ARGUMENTO DI CORTE

Corte sinembargo ta di pensamento cu e specialistanan ta cay den alcanse di e ley en cuestion. Esaki pasobra CMC mester wordo remarca como un entidad alia na gobierno, y segun e historia di e ley en cuestion, specialistanan ta cay bou di e termino di ehecutivo halto (topfuncionaris).  Y esaki no ta empugna cu normanan superior y of principio general di derecho of un ley mas halto ehecutivo. Y como tal no tin motibo pa dicta cu e ley pa loke ta specialista no ta compromete nan y cu e ehecucion di e ley pa nan ta illegal y cu como tal no mester conta pa e specialistanan.  Como tal huez a rechasa e demanda di e specialistanan y CMC, y a ordena pa nan paga e gastonan di e caso y cu e sentencia pa loke ta e gastonan, por wordo ehecuta mesora. Pa e sentencia completo, click AKI.