Trinta cas a haya bishita pa cobransa di multa y 3 a persona a keda deteni

Posted on 6/12/2023, 5:50 PM AST | Updated on 6/12/2023, 6:03 PM AST

ORANJESTAD - Ministerio Publico a cuminza awe cu cobramento activo di debe di multa habri. Dos team di CEA (Cuerpo Especial Aruba) a subi caya awemainta tempran pa bishita hende na cas cu tin debe di multa y pa cobra e multanan aki. CEA a bishita mas cu 30 adres awe, tanto pariba como pabao di brug. Un total di tres persona a keda deteni. Mayoria di hende a paga mes ora cu nan a haya CEA para na nan porta.

E accion lo continua henter e siman aki. CEA lo sigui bishita personanan cu debe di multa. Tur hende cu no paga nan multa of no paga nan multa por completo, lo wordo deteni y transporta pa KIA pa sinta e dianan di detencion (vervangende hechtenis) pa cual Huez a condena nan ora el a duna nan multa.

Ministerio Publico ta haci atrobe un yamada urgente na personanan cu debe di multa:

- Bo persona por paga online via cuenta bancario 4000905 di ArubaBank bao mencion di e parketnummer

- Bo persona por swipe cerca cahera di OM. No tin mester di haci afspraak(normalmente si mester)

- Si Bo persona ta di pariba, por paga multa na Warda di Polis San Nicolas di 8’or di mainta pa 12’or di mainta e siman aki so. Dos trahador di OM ta sinta cla na Warda di San Nicolas pa atende bo persona

- Bo persona por paga cu CASH tambe E SIMAN AKI SO.

Especialmente pa e accion aki, Ministerio Publico ta habri non-stop e siman aki tur dia di 08.00’or di mainta pa 15.30’or di atardi. Cu excepcion di diabierna ora OM ta habri te 12.00’or di merdia. Dus riba diamars, diaranzon y diahuebs bo persona por acudi na OM durante lunch tambe. No tin mester di haci afspraak, bo persona por gewoon cana drenta.