- Oduber: Cifranan di AAA ta indica cu tin un demanda fuerte pa Aruba
- Carchi ta cabando pa wak comediante Marko en bibo na Aruba
- Veld nobo di stadion Guillermo Prospero Trinidad ta wordo evalua awor
- Pelotero Yiu di Corsou Kenley Jansen tin su mes music label: ‘KJ74 Entertainment’
- Hasta den restante di wega suspendi, Feyenoord ta superior riba Ajax y ta gana 4-0 na Hulanda
Den 5 aña di existencia, Veiligheidshuis a trata 700 caso di problema familiar complica
ORANJESTAD - Veiligheidshuis ta existi cinco aña. Den e cuadro aki premier di Aruba señora Wever-Croes tabata di bishita awe. E premier a join un reunion den cual tur partner di Veiligheidshuis tabata presente. Hunto cu e premier como voorzitter di e stuurgroep di Veiligheidshuis, ta wak back cu orguyo riba cinco aña hopi productivo, den cual a pone bista riba mas cu 700 caso di famianan y personanan cu problematica complica. E necesidad pa traha hunto ta wordo carga pa tur e partnernan. Gobierno di Aruba tambe tin un commitment constante y fuerte cu Veiligheidshuis.
KICO TA VEILIGHEIDSHUIS
Veiligheidshuis ta un red di partnernan di e cadena di husticia y e cadena di cuido. Meta ta pa aporta na seguridad di Aruba dor di preveni y reduci cu hende ta cay back riba mal caminda (recidive), molester, criminalidad y asina yama ‘maatschappelijke uitval’ ora di problemanan complica (cu hende ta stop di funciona den comunidad). E hermentnan ta un combinacion di represion, intervencion y cuido. E partnernan ta (entre otro) Ministerio Publico, Polis, Voogdijraad, FCCA, Stichting Hunto y Wit Gele Kruis, pa menciona un par. Ademas tin tambe e partnernan flexible, manera OC y Departamento di salubridad public.
HOBENNAN NA RIESGO
E ultimo añanan Veiligheidshuis a crece bastante. Premier Wever-Croes ta wordo teni na haltura regularmente tocante tur e trabaonan. Un desaroyo preocupante ta e aumento den e cantidad di melding na Veiligheidshuis di hobennan na riesgo cu problemanan grave y complica. Aki mester pensa riba uso di droga y alcohol bao hobennan, drop-out di scol y violencia den e hogar. Tambe na hobennan cu experiencianan traumatico, problemanan mental y problemanan di gang. Di tur melding na Veiligheidshuis 45% ta trata di hobennan na riesgo.
SEÑALA NA ORA
E enfasis di e trabao di Veiligheidshuis lo bay cay mas y mas riba señala problemanan serio cerca hobennan den un fase hopi tempran. Actualmente un grupo di professionals ta sigui e training yama ‘terapia multidimensional pa famianan’ pa por reach out na hobennan y famianan criminal y duna nan ayudo. Banda di esey Veiligheidshuis lo sigui desaroya cu partnernan flexible nobo den ramo di enseñanza, manera e schoolbestuurnan, epb y inspectie di enseñanza.
RELATO ANUAL
For di e relato anual, cu a wordo presenta recientemente tambe na premier, a resulta cu na 2022 tabatin 161 caso nobo. Na cada reunion di Veiligheidshuis ta bin cinco pa siete caso nobo. Pa reunion -Veiligheidshuis ta reuni dos biaha pa luna- ta trata un maximo di 30 caso. Mas cu mitar di e casonan (65%) ta wordo trata exitosamente dor di e acercamiento hunto y e ayudo y tratamiento cu e personanan y famianan ta haya den e cadena di cuido.
Huez a kita cachonan peligroso di nan doñonan, y multa nan 1000 florin
ORANJESTAD – Corte diabierna atardi a trata un caso interesante, cu a resulta den un decision di huez pa kita dos cacho peligroso di nan doñonan, y a multa nan cada uno 500 florin, como castigo pa no a actua como doño responsabel di nan respectivo cachonan. Ministerio Publico a informa diabierna cu a dicidi pa trece e caso dilanti mirando e embergadura y impacto cu esaki tin riba comunidad, unda cu e keho mas grandi na Aruba aworaki, ta molester di cachonan di caya na Aruba.
Huez a bolbe rechasa libertad pa polis Vos y ta trata caso comienso di December awor
ORANJESTAD – Bou di lagrimas e agente policial R. Vos a tende di Corte diahuebs atardi, cu e mester keda cera na KIA te ora cu su caso bin dilanti dia 8 di December proximo. Huez despues di a tende tanto argumentacion di fiscal como abogado Defensor, a rechasa e peticion pa suspende su detencion te e momento ey. Vos ta sospechoso di a proveni e informacion piolicial na e periodistanan y tambe di traficacion di persona. E ta cera ya 6 luna, y awor ta confirma cu e lo keda cera pa 3 luna mas, cu ta bira un total di 9 luna, desde cu e la cay cera na maart di e aña aki.
Corte a sentencia ex hefe cahero di DIMP na 3 aña di prizon pa malversacion
ORANJESTAD – Corte diahuebs a sentencia un ex funcionario di Departamento di Impuesto, DIMP, Filomena Maduro na 3 aña di prizon, di cual 1 aña ta condicional. Huez a bisa diahuebs cu e ta haya proba cu Maduro a comete e actonan aki y cu e ta un sla formal pa tanto e departamento como e coleganan trahado. Ademas e ta viola e confiansa cu ta hinca den e trahado y cu pueblo mester por confia den un persona asina. Na final huez a dicidi cu ta cobra Maduro e suma cu e la coi di un forma illegal di e departamento pero cu esaki lo tuma lugar durante un caso fin di October proximo. Maduro tin 14 dia pa apela e sentencia si e no ta di acuerdo.
Ministerio Publico a yega na acuerdo cu sospechoso Croes den caso Flamingo
ORANJESTAD - Ministerio Publico a informa diahuebs merdia cu recientemente e la cera un acuerdo di transaccion den e caso Flamingo contra e sospechoso Humprey Anthony Croes pa un suma di Afl. 25.000. Tabata na Maart di 2022 cu e la keda deteni como e di dos sospechoso den e caso aki.
OM: Accion di Afpakteam na aeropuerto ayera, tabata pa manda ‘señal’ cu ta control constant!
ORANJESTAD – E accion cu Ministerio Publico a raporta ayera di afpakteam na Aeropuerto Reina Beatrix, ta algo cu nan lo tene regularmente di awor en Adelante. Asina vocero di Ministerio Publico Ann Angela a clarifica pa Noticiacla. Ayera a anuncia cu a controla riba tur buelo pa Republica Dominicana. Noticiacla a puntra pakico e aeroliña ey y kico e resultado tabata. “No a detene ningun hende y tampoco a confisca placa” Angela a sigura e portal aki. “E tabata mas tanto un señal” y e motibo pakico a cuminsa cu e aeroliña ey tambe tabatin su motibo. “Dicon a cuminza ey? E ta un escogencia cu a wordo haci. E intencion ta pa Afpakteam regularmente tene e tipo di accionnan aki di awor pa dilanti na airport”, Angela a finalisa bisando.
Corte: Ta trata apelacion di caso Avestruz integralmente na mei di 2024
ORANJESTAD – Corte di apelacion a reserva e di dos siman di luna di mei 2024 pa trata e caso di apelacion Avestruz. Asina e tres hueznan a informa e abogadonan di e 7 sospechosonan durante e asina yama regiezitting diamars atardi. cu ta wordo scucha un biaha mas den apelacion. Ta trata di e sospechosonan Benny Sevinger, Pieter Sussebeek, Carlo Mansur Jr, Maria Leoncita Arends, Ninuska Nuñez, Edgar (Gabby) Werleman y Curt Harms. Tur sea a apela parti di nan sentencia den e prome caso, of Ministerio Publico a apela nan sentencia. Specificamente, cuater sospechoso a apela parti di nan sentencia mientras cu Ministerio Publico a apela sentencia di tres sospechoso.
Follow NoticiaCla
