ORANJESTAD – Un turista Mericano (Harry Lynch) cu a bin pasa su vacacion na Aruba, awor ta pega riba nos isla, debi cu e no tin suficiente fondo pa cubri su gastonan medico despues di a bira mal riba nos isla. Asina un portal di noticia di Boston (di unda e homber ta) ta relata. A trata di un paramedico retira, cu tabata disfruta di Aruba cu su casa, ora cu diripiente e la bira malo y keda hospitalisa cu un infeccion. Nan ta doño di un timeshare cu tur aña nan ta usa na Aruba. Mientras cu e infeccion a cura, awor e homber tin problema cu complicacion di curason cu ta strobe di biaha bek pa Merca di un forma normal, esta bula comercialmente. Y nan no tin sufficiente seguro pa paga un buelo ambulance. Como tal a cuminsa un pagina GoFundMe, pa por a yuda cu placa pa financia nan biaha bek. “Harry no ta stabiel. E no por biaha riba un buelo regular” e casa ta bisa. Nan mester di 150 mil dollar pa logra yega te nan destinacion final cu ta Boston. No ta prome biaha cu un situacion asina ta presenta cu turistanan Mericano ta yega Aruba di vacacion, bira malo y haya nan mes cu problema pa bolbe nan pais, debi na falta di fondo of no tin sufficiente seguro pa cubri esaki.
ORANJESTAD – Mas cu mitar di studiantenan local (Aruba) cu a studia usando e prestamo escolar ‘Dienst Uitvoering Onderwijs voor studenten en scholieren’, conoci como DUO, tin problema pa paga esaki bek , ta paga menos cu nan mester paga, of mas pio, no ta paga nada bek mes. E grupo aki ta sigui ta un problema segun representante di DUO, Marit Verbogt manera cu e la splica diahuebs den e programa Noticiacla LIVE. Si tin mas of menos 4000 ex studiante cu tin cu paga bek, y ta algo di mas di mitar tin e problema, por deduci cu e cantidad aki ta mas cu 2 mil studiante local. Verbogt ta splica kico e situacion ta, den e video adhunto. E siman aki e representantenan ta na Aruba te cu otro siman diabierna pa atende cu e grupo aki y tambe studiantenan cu kier un beca via DUO. Nan por acudi na e centro John F Kennedy durante oranan specifico cu ta ubica riba e pagina di FB di nan y tambe e portal di DUO.
ORANJESTAD – E situacion di Dengue na Aruba ta birando mas alarmante. Diahuebs Departamento di Salud Publico a informa cu a cuminsa hospitalisa hende cu ta infecta cu Dengue. Ta trata di 2 persona. Un di e personanan aki ta bek na cas, y e otro ta sigui interna cu complicacionnan serio debi na Dengue. Por a verifica cu ningun di e personanan aki a biaha recientemente, indicando cu ta trata aki di dos caso di Dengue di transmision local. DVG ta informa tambe cu ta observando mas caso cu ta di spera – of cu ta normal – pa e temporada aki.
ORANJESTAD - Entrante augustus 2024 e alumno di klas 1 lo siña lesa y skirbi na Papiamento. A organisa un trayecto di preparacion pa asina ekipa e cabesante y e maestro di klas 1 di scolnan basico (basisschool) cu e hermentnan necesario pa por implementa e parti aki di e maneho nobo di idioma den scol.
ORANJESTAD - Entrante 18 di april 2024, pa 9or di anochi via TeleAruba, Aruba completo lo por cuminsa presencia e serie documental ‘Blue Lizard Effect’. Un serie documental revolucionario cu ta profundisa su mes den e mundo fascinante di Aruba, pero di un angulo diferente. E serie ta explora e concepto energetico di felicidad y e conexion profundo cu e cultura, e hende, y naturalesa di e isla.