Meteo cu aviso pa calor excesivo na Aruba e weekend aki!

ORANJESTAD – Servicio Meteorologico di Aruba diahuebs a emiti un aviso pa calor excesivo valido di mayan 12 pm di merdia (diabierna) 2 juni te 6 pm ast diamars 6 di juni. Segun meteo pues, e tempo di calor excesivo ta ser spera den e weekend aki y parti di otro siman…

KICO TA CAUSA E CALOR EXCESIVO

Un gradiente di precion abou causa pa un disturbio den diferente nivel di atmosfera lo produsi un biento zwak di direccionan varia. e  caracteristica aki lo perdura pa algun dia te na ora e disturbio kita for di Caribe. Temperaturanan maximo di diabierna pa diamars lo oscila di 34 pa 36 grado celcius. Porcentaje halto di humedad den 80 te 90% lo contribui na un indice di calor (temperatura aparente) rond di 40 te 45 grado celcius cada dia.

E CALOR LO NO BAHA MUCHO ANOCHI

E calor y humedad halto lo no baha mucho anochi cu temperatura bahando solamente te un minimo di 27/ 28 grado. Esaki lo aumenta e peligro pa hendenan cu no por haña un lugar adecua pa refresca nan curpa.

CALOR ASESINO

Calor excesivo ta e asesino di tempo nr. 1…hende mester ta prepara pa e peliger cu calor excesivo ta ocasiona.  Mucha chikito…hende grandi i hende cu malo di curazon ta esnan mas expone. Limita actividad pafo di cas pa oranan trempan di mainta of ora solo baha. Si bo tin un airco huzele, of a lo menos habri bentana pa laga aire pasa i circula.

ACCION DI PRECAUCION

Un aviso pa calor excesivo ta nifica cu un periodo di temperatura halto ta wordu spera. E combinacion di temperatura y humedad halto lo combina pa crea un situacion den cual malesa causa pa exposicion prolonga na temparatura halto lo por presenta.

Recomendacion: Bebe hopi likido, keda den camber cu airco…keda aleja for di solo.