Iberostar Grand Aruba ta habri su portanan na 2024 cu 240 camber

EAGLE BEACH – Si tur cos bay segun plan, pa otro aña (2024) den zomer, Aruba lo conoce e prome hotel di e cadena Iberostar Group, esta Iberostar Grand Aruba, ubida na Eagle Beach unda cu antes tabata POVA Club. E hotel ta 35% cla caba, pero asina mes den e estado inicial faltando un aña pa complete e proyecto, ya a cuminsa haci e trabounan pa promove e hotel y laga Aruba cera conoci cu e cadena prestigioso y su intencionan pa cu nos isla. Pa esaki, un grupo di periodista di Aruba (entre nan Noticiacla). a biaha recientemente pa nan propiedad cotiza na Riviera Maya, Mexico, pa experencia esaki personalmente. E resultado, ta dos dia intenso di informacion, bishita y conocemento di loke ta spera Aruba entrante otro aña. Hunto cu e periodistanan, ehecutivonan di ATA y AHATA tambe a conoce esaki, y mira pues kico tur e cadena aki ta ofrece. 

KEN TA IBEROSTAR

Iberostar Group ta un compania multinacional Spaño di Miquel Fluxà Rosselló y famia, na Palma de Mallorca, cu ta doño 100% di tur e 100 hotelnan reparti den 16 pais, cu ta emplea mas di 30 mil persona. Loke ta diferencia nan di hopi, ta e determinacion pa concientisa tur hende riba medio ambiente, y nan empeño pa contribui na un mihor bida marino y experiencia di e bishitante. Algo cu nan lo haci cu e propiedad na Aruba tambe, completo cu un espacio estilo laboratorio estudiantil pa alumnonan di Aruba. 

IBEROSTAR GRAND ARUBA

E hotel na Eagle, tin cu bira e prome di 3 na Aruba, aunke e plannan pa e otro dosnan ainda ta den discusion inicial. Si e nomber Iberostar ta zona conoci, ta pasobra nan ta e mesun compania cu na 2023 a cumpra Tiera del Sol. E lo ta un hotel cu lo opera estilo EP (European Plan), cu ta diferente na nan operacion normal debi cu nan ta conoci pa un hotel All Inclusive. Pero pa e por a fit na Aruba a opta pa cambia esaki y haciele EP. E ta bira un hotel di 240 camber combina cu suites, completo cu 3 piscina, ballrooms, tienda y 3 restaurant tematico. Loke ta tipifica e hotel, ta e nivel di servicio, manera un mayordomo (butler) pa cada piso y e cantidad di personal cu tin pa satisface e necesidad di cada huesped. 

TURISMO RESPONSABEL

Loke a resalta durante e bishita di conocemento recientemente di prensa, ta e empeño di e hotel pa ta actua responsablemente pa cu medio ambiente y salud di su huespednan (ora ta trata e alimentacion cu e hotel ta provee). Pa garantisa esaki y pa e no keda solamente algo di palabra, e compania tin un departamento completo dedica na e meta ey, cu su propio biologo y un ekipo cu ta sostene, acopla na un programa desaroya specialmente pa nan cu yama ‘Wave Of Change’, cu ta garantisa cu e laman cu ta sea rondona of ubica cerca di e hotel, ta protehi den e miho forma, completo cu e cuido di e bida marino eynan, y tambe e material cu ta usa den e hotel, tanto artefacto y cuminda diario. Pa bay un paso mas leu, e hotel ta percura sigura y garantisa cu pa tur loke drenta e hotel na cuminda, esaki ta di calidad halto, door di sigui un protocol estricto pa garantisa cu e loke wordo presenta te riba e tayo, ta di calidad. Keda pendiente pa mas for di e bishita recien pa Riviera Maya, di Iberostar Grand.