Arends: No por permiti cu SABA ta haci e cuido mas caro door di exigi mas placa

ORANJESTAD - Na e momentonan aki nos no por permiti cu SABA ta haci e cuido mas caro door di exigi mas placa y na mes momento reduci e cantidad di cama. Asina minister encarga cu adultonan mayor Ursell Arends a bisa diabierna. MEs momento e ta bisa cu e tin tur atencion pa e asunto aki. Segun e mandatario, esolucion pa cuido di adulto mayor mester wordo busca for di un prespectiva mas amplio di locual ta wordo discuti na e momentonan aki. E ta mustra cu  cadena di cuido entre e partnernan cardinal cu ta atende cu adulto mayor no ta funcionando optimalmente. E ta sigura tambe cu e ta canando e caminda pa traha un sistema pa conecta tur profesional pa loke ta trata e cuido y bienestar en general pa nos adultonan mayor.  

PARTNER IMPORTANTE 

“Nos ta reconoce cu SABA ta un partner importante pa e cuido di nos adultonan mayor. Sinembargo, ta di lamenta cu e impasse entre Gobierno di Aruba y SABA a wordo hiba den un rumbo caminda ta enfoca riba probecho personal en bes di bienestar general.  Como gobernante mi ta enfoca riba solucion en bes di hunga populista y crea mas descordia den nos comunidad”, Minister Arends ta enfatisa.

GOBIERNO DEN DISPUTA 

E mandatario a confirma cu Gobierno ta den disputa cu un organisacion cu ta exigi mas fondo (refiriendo su mes na SABA:red) mientras di otro banda tin 420 persona cu tin mester di un cuido urgente y di calidad den nos comunidad. “Na e momento aki tin un lista di espera di 170 persona cu no ta hayando cuido 24/7 y mester keda warda na nan cas sin e cuido apropia. Tin 250 persona cu ta hayando cuido den casnan di cuido ‘priva’ cu ta grita auxilio pa sosten pa por brinda un miho calidad di cuido” e mandatario a sigui bisa.

ENTRADA NECESARIO 

Ademas, e mandatario ta bisa cu dirigente di casnan di cuido priva no ta haya e entrada necesario pa maneha un cas di cuido debidamente.  E pensioen cu e adulto mayor ta haya tampoco no ta yega pa paga e casnan di cuido cu ta costa entre Afl.2000 pa Afl. 2500 pa luna. Asina tin mas adulto mayor y nan famia cu awe ta den nan cas, sperando ariba un alivio pa nan por haya e cuido adecuado. “Dokternan di cas ta man na cabez paso nan no por sigui atende cu e demanda di adulto mayor cu ta na cas y no por haya un luga unda nan por ricibi e cuido necesario 24/7”. Segun e mandatario pues, na e momentonan aki nos no por permiti cu SABA ta haci e cuido mas caro door di exigi mas placa y na mes momento reduci e cantidad di cama. Mescos cu SABA, Minister Arends ta kere cu mester sigui inverti den cuido avansa. Pero esaki mester wordo haci na un manera responsabel y mester duna cuenta con fondonan publico ta wordo aloca. E ta sigura cu su prioridad na e momentonan aki, ta pa crea mas accesibilidad na cama pa adulto mayor cu mester di cuido 24/7. “Fortifica e comunicacion entre tur e profesionalnan den sector di cuido y tambe den sector social pa finalmente crea un cadena di cuido pa adulto mayor structura y integral” e mandatario a bisa finalmente.