- Plasterk ta sigui papia awe cu partidonan PVV, BBB, VVD y NSC na Hulanda
- Bucuti & Tara Beach Resort ta Invitado Special na COP28 di Nacionnan Uni
- Minister Thijsen a trata tema di geschillenregeling cu presidente di Staten na Aruba
- LATAM Airlines a lansa ruta nobo Lima-Aruba
- AFAR: Aruba e prome di 6 isla scohi como destinacion ‘exotico’ pa 2024
Schlipken (ATA): Aruba y Colombia ta comparti lasonan di e.o. turismo, economico y comercial
BOGOTA - Na ocasion di 40 aniversario di A.T.A. na Colombia, director di A.T.A. Latino America, Jordan Schlipken a elabora riba e posicion importante cu Colombia tin pa Aruba y e conexion entre e dos paisnan. No tin ningun duda cu Aruba y Colombia ta comparti lasonan economico y comercial, cultural, di salud y mas cu claro - di turismo.
Den transcurso di e ultimo decadanan, e ekipo di A.T.A. a traha duro pa crea un legado exitoso di promove nos isla na e mercado Colombiano, hunto cu socionan den e mercado. A.T.A. ta premira cu e cantidad di bishitante cu Aruba lo ricibi for di Colombia y Latino America lo sigui crece den e aña nos dilanti, mirando e aumento den cantidad di vuelo y asiento cu ta conecta Aruba cu Bogota y Medellin y tambe e introduccion di un ruta nobo entre Aruba y Cali.
E exito aki ta resultado di trabao incansabel durante e ultimo 40 añanan y e confiansa den e producto Aruba. Sigur no por keda sin reconoce e rol importante di e ekipo y ex-directornan di A.T.A. Colombia y Latino America.
Jordan Schlipken ta mira dilanti cu e mesun determinacion pa sigui cosecha e bon relacion entre Aruba y Colombia, particularmente den e sector di turismo y negoshi. Recientemente Schlipken a keda apunta como miembro di hunta di directiva di Holland House pa aña 2023 - 2024. E meta principal di Holland House ta pa promove colaboracion y cooperacion entre empresarionan Hulandes y Colombiano, stimulando asina e oportunidadnan di negoshi entre Colombia, Aruba, Curaçao, St. Maarten y Reino Hulandes.
Esaki ta un paso importante pa sigui fortalece e conexion entre Aruba y Colombia, y ta seya e compromiso di parti di A.T.A. pa sigui inverti den e mercado Colombiano y asina logra e obhetivo di aumenta e cantidad di bishitante for di Colombia y Latino America mas ainda den futuro, creando mas diversificacion.
Ganador di loteria di 25 miyon dollar Mericano ta scohe Aruba pa pasa Pasco
MASSACHUSETTS – Un ganadora di loteria Mericano di 25 miyon dollar Mericano, a dicidi di usa parti di e placa pa pasa su Pasco na Aruba. E la opta pa ricibi sup ago den un solo biaha, y ta haya 16.250.000,= den un pago prome cu impuesto. E interesante ta cu na 2006 e mesun persona a gana 1 miyon dollar caba durante un otro premio di lotto. E ta planea pa ‘goza bida’ y ta pasa pasco cu su pareha Jason Perkins, na Aruba. Ademas e ta paga e debe estudiantil di su tres yiunan, cumpra un auto nobo y haci algun otro compra grandi familiar. E premio ta esun di mas grandi cu ta wordo paga den estado di Massachusetts.
Embahador di Reino Hulandes na Peru impresiona cu e forsa di marca Aruba na Peru
LIMA - “Mi ta hopi orguyoso cu e delegacion di turismo di Aruba a opta pa envolvi e embahada di Reino Hulandes den e esfuerso aki, mirando cu Aruba ta ofrece hopi pa Peru y demas paisnan”, asina Alexander Kofman, Embahador di Reino Hulandes pa Peru, Ecuador y Bolivia, a duna di conoce. E delegacion di Aruba, consistiendo di ehecutivonan di Oficina di Turismo di Aruba, di Aruba Airport Authority y di Migracion Aruba, a topa cu e representante diplomatico na Lima, Peru.
Rafael Nadal ta anuncia su regreso den tennis despues di ausencia di casi un aña
MADRID – E tenista internacional Spaño Rafael Nadal ta bolbe riba cancha internacional di tennis na comienso di januari 2024 na Brisbane, despues di tabata ausente pa un aña. E ta participa na e torneo habri di Australia e prome siman di januari 2024. Asina e la participa awe riba un video riba e Plataforma X (ex Twitter). Despues di a keda lesiona durante e mesun torneo aki na comienso di aña, e la sigui hunga pero na maart a perde den e prome buelta di un torneo y a dicidi pa retira pa drecha su situacion. E lo a sufri di un lesion na su heup.
Redaccion di varios medio di prensa Hulandes a welga contra negosacion di CAO
HILVERSUM – Periodistanan di varios redaccionan di noticia Hulandes a welga pa un ora awe pa motibo di problema cu negosacion di CAO. Ta trata di periodistanan di e medionan NRC, de Volkskrant, Trouw, Het Parool y Nu.nl. Esey a nifica cu pa un ora, e portalnan di e noticieronan ey no a wordo actualisa. E welga tabata un accion di advertencia pa omicion di un bon oferta di cas editorial DPG Media, cu ta responsabel pa p.e. medionan Trouw y Het Parool y tambe e cas editorial Mediahuis, bou di cual e medio NRC ta resorta. E periodistanan a bisa cu lo bin cu accionan mas fuerte si no tin un miho oferta pronto.
Top diplomatico y ex minister Mericano Henry Kissinger a fayece
WASHINGTON – Ex minister y top diplomatico Mericano Henry Kissinger a fayece ayera na edad di 100 aña. E la hunga un papel importante den politica Mericano den añanan 70 pero tambe tabatin hopi influencia despues. E tabata minister di relacionan exterior bou di gabinete di presidente Richard Nixon. E tabata tambe crucial den e situacion cu Rusia. E la negosha entre otro e acuerdo SALT, unda cu e paisnan poderoso a reduci nan cantidad di arma nuclear considerablemente. E la ricibi tambe e premio Nobel di paz.
Paro di fuego den Gaza ta cana trankil y parti di rehenan ta keda libera
GAZA – Riba e prome dia di paro di fuego entre Hamas y Israel, cos ta canando trankil. E prome trucknan cu ayudo ta drentando e faha di Gaza. E intencion ta pa e prome rehenan Israeli keda libera pa Hamas awe tardi ora di Gaza. E paro di fuego a bay den efecto awe marduga 2’or ora di Aruba.
Follow NoticiaCla
