Adkins: Ta spera casi 8000 bishitante na Aruba pa Soul Beach Festival 2023

Adkins: Ta spera casi 8000 bishitante na Aruba pa Soul Beach Festival 2023

Posted on 05/25/2023 10:23 am AST | Updated on 05/25/2023 10:26 am AST

ORANJESTAD – Tur cos ta cla pa e di 21 edicion di Soul Beach Music Festival cuminsa diabierna. Segun e promotor ehecutivo di e evento, Mark Adkins a bisa Noticiacla e siman aki den e programa ‘Noticiacla LIVE’, nan ta spera casi 8000 bishitante cu ta bin pa Aruba pa e festival. Mas sigur ta trata di 7.800 bishitante, cu ta mas cu e 7100 bishitante cu a yega Aruba aña pasa pa mira e festival. Y esey ta cu aña pasa tabatin e cantidad record cu e festival a yega di haya durante sus 21 aña di existencia. E forma con por confirma e cifra, ta basa riba benta di ticket. Y nan por saca afor exacto cuanto hende a cumpra entrada, y di unda y for di ki area. Logico cu nan mester e ora biaha pa Aruba pa por presencia e concierto. Ta conoci cu pa tin sosten di patrocinahe di oficina di turismo di Aruba ATA, nan mester por cumpli cu un cantidad specifico di persona cu ta bin Aruba pa e festival. Y tur aña nan a sa di surpasa e cantidad rekeri. Tabata notable cu te hasta for di Panama, via Copa Airlines, tabatin bishitantenan yegando Aruba e biaha aki, djis pa e festival. Organisadornan ta kere cu esaki ta debi cu e coneccion ta mas practico pa bishitantenan di p.e. California y otro areanan mas remoto. 

ARTISTANAN

E artistanan aliña pa e aña aki ta entre otro The Roots, Jill Scott, Lucky Daye, Anthony Hamilton, Deon Cole & Tiffany Haddish. Entre nan tin comediantenan cu lo presenta e diabierna 26 di mei den e anochi di comedia na Renaissance Festival Arena, mientras cu pa diasabra 27 y diadomingo 28 di mei tin tambe e aliña di artista The Roots and Anthony Hamilton Jill Scott and Lucky Daye.

 

  • Powered by SETAR