Carnival Celebration den su prome bishita a trece 5683 turista crucero pa Aruba

ORANJESTAD – E bapor crucero Carnival Celebration den su prome bishita a trece 5683 turista crucero pa Aruba. Asina minister di turismo Dangui Oduber a confirma diamars den un comunicado. Segun e mandatario, diamars tabata un dia cu hopi movecion turistico pa nos centro di cuidad debi na e prome call di e barco crucero Carnival Celebration. Minister Oduber a bisa di ta satisfecho di mira un otro mega crucero pa prome bes na nos waf. E mega crucero aki ta pertenece na Carnival Cruise Lines y a yega nos isla cu 5683 turista crucero riba dje. Esaki sigur ta refleha e maneho di turismo di Ministerio di Turismo.

Locual ta hopi positivo pa Aruba ta cu e barco crucero cu a yega 7or di mainta ta sali bek te cu 10or di anochi, pues esaki ta keda staciona na e porta di Oranjestad pa 15 ora. Esaki ta nifica cu e pasaheronan aki lo tin mas ora pa nan aporta na Aruba su economia. 

Carnival Celebation por acapara 6500 pasahero, tin un total di 20 deck y ta midi 345 meter di largo. E ta un barco cu a wordo construi na aña 2022, pues e ta basta nobo. Carnival Celebration ta e barco crucero di mas grandi y esun principal (flagship) di Carnival Cruise Lines.  

TURISMO CRUCERO

Segun e minister, nos turismo crucero den e prome 4 lunanan a ricibi un total di 425.620 mil turista crucero. Esaki ta 70.185 mil turista crucero mas cu na 2019 y ta un crecemento di 19.7%. E cantidad di calls den aña 2023 tambe ta surpasa e cantidad di calls di aña 2019 den e prome 4 lunanan. Aruba su high season a termina na april y tawata uno historico.

Pa cu e luna di mei ainda falta 3 calls cu ta riba dia 30 di mei caminda lo ricibi 3 barco crucero cu ta Mariner Of The Seas, Celebrity Equinox y Carnival Horizon. Maske cu awor nos ta den low season Minister Oduber ta premira cu e aña aki ta bay bira un aña record pa nos turismo crucero si tene cuenta cu e tur e proyeccionnan.