Interpol: Ta extradita Joran vd Sloot prome siman di juni for di Peru pa Merca

LIMA – Un official di polis internacional, esta INTERPOL a sigura cu Joran vd Sloot lowordo extradite di Peru pa Merca durante e prome siman di juni, esta entrante otro siman. Agentenan di FBI lo haci esaki. Gobierno di Peru recientemente a aproba pa e extradicion tuma lugar, y vd Sloot manera cu Noticiacla a raporta caba, a bay di acuerdo pa esaki tuma lugar. Vd Sloot lo wordo trata pa caso di extorcion y estafa na Merca, pa cual e por haya sentencia di mas di 25 aña di prizon si haye culpable. 

DETAYE DI E TRASLADO

Den un entrevista cu Fox News Digital, e colonel di INTERPOL na Lima, Colonel Carlos Lopez Aeda a sigura cu vd Sloot lo ta disponible pa autoridad Mericano riba 29 di mei proximo pa su extradicion. “Entrante 29 di mei e ta disponible pa autoridadnan Mericano traslade pa Merca” Lopez a bisa. “Nan a indica cu durante e prome siman di juni un avion di FBI cu agentenan di FBI lo bin Peru pa extradit’e for di un base di forza aereo Peruano”. E official a bisa cu e extradicion lo no sosode mas laat cu juni 8 of 9 di e aña aki. Tambe e la sigura cu vd Sloot lo wordo transferi pa un prizon di seguridad maximo na Lima, entrante 25 di mei, esta diahuebs awor. Actualmente e ta wordo teni na e prizon Challapalca cu ta tarda sigur un dia den auto for di Lima.