Tjon: Ta tratando pa haci pago asap pa Cas di Cuido Ambiente Feliz

ORANJESTAD – “Nos ta bezig cu Directie Financien pa esaki tuma lugar ASAP” tabata e reaccion di minister di Asuntonan Social drs Rocco Tjon na Noticiacla diaranson mainta riba e noticia di problema di pago na e cas di cuido Ambiente Feliz. Noticiacla a raporta anteriormente cu e cas di cuido no a haya placa y tin problema awor. “Yes, e caso ta conoci pa nos” e mandatario a contesta e portal aki. 

FAYO

E ta admiti cu tabatin un fayo haci, pero cu ta wordo coregi aworaki. “Conseho di Minister a tuma decicion pa eenmalig aporta cu e fondonan cu tin mester. Y aworaki ta bezig cu Directie Financien pa e pago tuma lugar”e mandatario a sigui bisa. “Door cu den subsidie aanvraag pa 2023 no a tene cuenta cu esaki. Pa e motibo ey e sosten lo ta eenmalig y e stichting lo mester tene cuenta cu esaki aworaki si pa nan aanvraag na 2024” e minister a continua bisando. Ademas e mandatario a bisa cu mirando e suma cu ta uno cuantioso, di 700 mil florin, e fondonan lo bin di diferente Ministerio. Riba e pregunta, con lihe e trahadonan lo por ricibi nan placa, e mandatario a bisa “Nos ta bezig cu Directie Financien pa esaki tuma lugar ASAP”. 

E CASO

Manera cu e portal aki a raporta den un articulo anterior, e siman aki e personal di cas di cuido pa anciano Cas Briyante a bati alarma informando cu gobierno a informa nan cu ‘no tin placa pa paga salario ni pa sigi cu e proyecto’. Esaki ta un asina yama verpleeghuis pa meervoudig gehandicaped na Sanicolaas. Segun un mensahe cu a yega cerca e portal aki, a splica cu ‘ e resto di placa pa 2023 mester a drenta 2de siman di april pero nada ainda”. E personal ta bisa cu a informa nan cu ‘tabata tin un "fout" cu nan a lubida di hinke’ den e begroting pa 2023’, osea a lubida di hink’e den presupuesto. 

NO SA KI DIA TA HAYA PLACA

Tambe e personal a bisa cu no tin contesta di ki dia e placa lo pasa of si e lo pasa . “Pero ta un placa cu Gobierno a haña caba y awo no tey” nan ta sigura. Awe tin un reunion planea pero e grupo no sa kico ta spera nan. E cas aki tin mas di 10 cliente ta biba aden y nan mester di cuido special. E minister responsabel pa esaki, ta sr Rocco Tjon cu mientrastanto a reacciona (lesa articulo adhunto).