DIP: Director ta suspendi pendiente investigacion

ORANJESTAD - Director di Departamento di Infrastructura y Planificacion, DIP, a wordo suspendi pendiente un investigacion interno. Asina e departamento oficialmente a informa dialuna mainta, un rato despues cu noticiacla a publica e noticia aki.  Segun e informacion oficial, DIP ta un departamento crucial den e desaroyo di nos pais, y tin ya varios aña cu hopi atraso. E servicio na comunidad hopi biaha a wordo critica, debi cu hendenan ta wardando hopi aña riba un contesta riba nan peticionnan pa tereno, cambio di destinacion, prolongacion, etc. y no ta haya ningun contesta. “Desde cu Ministerio Publico a para investigacionnan penal den e departamento dos siman pasa, e investigacionnan interno y administrativo cu a inicia den pasado, por a continua. 

A suspende un empleado di DIP dos siman pasa y awor e director” e comunicado ta sigui bisa. Mientras tanto director interino di DIP lo asumi e liderazgo diario di e departamento y e lo wordo asisti pa un “klankbordgroep” di algun otro hefe di departamento, den cual lo concentra riba reorganisacion di e departamento y elimina e atrasonan. 

E “klankbordgroep” ta un comision consistiendo di mas hefe di departamento, cu lo conseha den e proceso.