- Departamento di Progreso Laboral (DPL) cu campaña pa entrega Formulario AMR 2023 den luna di Juni 2023
- Directie Financiën ta informa di e condicionan ora di trata cu cobransa pa instancianan di Gobierno
- Foyeto Abo ta bay studia dentro di poco na Hulanda – con pa registra den BRP
- DUCAPRO a presenta un plan pa promove e industria creativo y proteha e artistanan
- E prome barco di fruta y berdura di Venezuela ta yega Aruba dialuna awor
Kiwanis Club of Palm Beach a cumpli cu temanan oficial durante Reunion Annual
PALM BEACH – Diahuebs anochi, mei 4, 2023, Kiwanis Club of Palm Beach, bou di liderazgo di President Daniel Aguirre, a celebra su reunion annual, e reunion di mas importante di aña, den un atmosfera caluroso di hermandad y compañerismo, den cual no menos cu 38 miembro a atende.
Cumpliendo cu e statutonan di Kiwanis International y di e club mes, e agenda a consisti di cuatro (4) punto: 1) E aprobacion di e Statutonan (articulonan di Asociacion) nobo den cumplimento cu e Codigo Civil nobo; 2) Aprobacion di e miembronan cu lo bai firma e acto di Asosacion menciona como e testigonan principal; 3) Presentacion y aprobacion di e proceso di revision di e cuentanan anual di aña Kiwanistico 2020-2021; y 4) Aprobacion di e nominadonan cu lo bai conforma e directiva pa e aña Kiwanistico 2023-2024 y cu lo wordo instala na Oktober proximo.
E aprobacion di e statuto nobo, ta un iniciativa sumamente importante pa e club, ya cu e proceso aki ta garantiza cumplimento cu e lei nobo introduci cu e Codigo Civil nobo cu a wordo introduci na Januari 2021. Cu esaki, Kiwanis Club of Palm Beach lo wordo registra oficialmente na Camara di Comercio como tambe na Departamento di Impuesto, pues un proceso cu ta garantiza un nivel adicional di transparencia pa cu comunidad, pero en especial cumpliendo cu un rekisito di instancianan, en especial empresanan, cu ta colaborador y contribuyente di Kiwanis Club of Palm Beach.
E aprobacion di e cuentanan financiero anual ta un momento importante unda ta verifica e administracion y finanzas di e Club conforme normanan di ‘accounting’ professional. E revision y evaluacion aki ta na encargo di un comision independiente (e asina yama: ‘financial review committee’) cu experiencia amplio den e ramo aki. Pa Kiwanis Club of Palm Beach e proceso aki ta sumamente importante pa asina garantiza transparencia y seguridad cu tur fondo cu ta wordo recauda ta haya un destino caritativo y/of social. Ta aplica e mesun proceso pa e administracion di e contribucion di e miembronan cu ta un administracion completamente separa. Kiwanis Club of Palm Beach Aruba kier tuma e oportunidad aki pa extende palabranan di gradicimento na tur empresanan y personanan cu di un forma of otro a haci un donacion/contribucion na e Club.
E aña aki, contrario na e tradicion durante e reunion anual, e trabow di e comision di eleccion di e directiva nobo tabata diferente. Despues cu e “committee chair”, FK Roy Mezas, a delinea e proceso cu e comision di nominacion a encamina pa yega na e ‘team” di nominadonan pa e directiva di 2023-2024, como tambe e importancia di un eleccion transparente, FK Roy Mezas mes tabata tin e honor di presenta un nominado adicional pa director. Pa e motibo aki, e eleccion a wordo reparti den dos fase: 1) e eleccion di e “officers” cu a wordo aproba “by aclamation” y 2) e eleccion di e Directornan cu a wordo haci pa medio di un sistema di voto conoci como “vote by ballot”.
Na final di e proceso, e directiva pa aña Kiwanistico 2023-2024 lo consisti di e siguiente “officers”: Daniel Aguirre (Immediate Past President), Onasito “Chito” Thiel (President), Ross Brezovar (Incoming President), Michel Frank (Vice President), Michel Janssen (Treasurer), Robert-Jan Moons (Secretary). E siguiente miembronan lo confirma e team di Directornan pa e aña Kiwanistico 2023-2024: Richard Roy, Alvin Wever, Rodney Kock, Evan Giel, Franklin Hoevertsz, Randolph Ruiz y Christopher Robles.
E anochi a culmina cu e acostumbrado hermandad y compañerismo entre miembronan probechando di e anochi pa asina un biaha mas elabora y actualiza ariba topiconan importante cu ta relaciona cu nos comunidad, pero en especial e bienestar di nos muchanan.
Cas di Cultura a presenta Leerling Piano Concert cu maestro Winklaar
ORANJESTAD - Fin di siman pasa, a tuma lugar e Leerling Piano Concert 2023 di alumnonan bou guia di maestro Kyle Winklaar y studiantenan di e instrumento Piano, cu host Addonsito Croes. Un total di 22 studiante di e edadnan di 7 pa 18 aña, a duna e publico presente, regalonan musical unico riba piano.
Jill Scott y Lucky Daye a cera e anochi final di Soul Beach Festival cu broche di oro!
ORANJESTAD – E artistanan di renombre Jill Scott y Lucky Daye a clausura e di 21 edicion di Soul Beach Music Festival diadomingo anochi na Harbor Arena. E anochi tabata esun miho bendi di e dos anochinan di concierto, y esnan presente, 7.700 bishitante segun organizador Mark Adkins mes a revela e anochi ey, a goza di cada interpretacion. Daye a inicia e anochi, y aunke cu na final tabatin fayo technico cu mester a para su presentacion prome cu tempo, esaki no a stroba e publico di gusta loke nan a mira. “Cosnan cu ta pasa” Daye a bisa y a continua. Despues toch mester a para ora cu no por a haya e fayo. A sigui un presentacion di entrega di premio na publico, manera e premio principal unda cu un persona por a gana un pasashi completo cu su estadia pa e proximo SBMF 2024. Despues tur hende tabata cla pa e presentacion principal di e diva Jill Scott. E organizador Adkins mes a confia na e portal aki cu esaki tabata su faborito e biaha aki. Scott, bisti coloridamente, a mustra cu su voz potente tey y su intrepetacionan un tras di otro tabata mustra su talento di voz inmenso. Sigur e no a defrauda su publico cu a bin na grandi pa mira su presentacion. Un otro fin di siman exitoso, unda cu e organisadornan por wak bek riba un siman completo di actividad cu e unico meta di genera trafico pa Aruba, cu ta genera tambe entrada pa e isla, di un forma musical. Otro aña, ta bira e di 22 edicion, Soul Beach Music Festival 2024!
The Roots y Anthony Hamilton a comanda e di dos anochi di Soul Beach Music Festival 2023
ORANJESTAD – Diasabra anochi tabata e prome anochi ‘musical’ di Soul Beach Music Festival 2023 despues cu e anochi prome e evento a lansa cu su Comedy Night. E anochi internacional a cuminsa cu e artista Anthony Hamilton cu a presenta su repertoire conoci pa su audiencia. Pero e streanan di e anochi mes tabata The Roots, conoci pa ta un di e gruponan di genero rap mas prolifico den musica contemporario, y cu suficiente premio Grammy otro premionan Platino y di Oro pa establece nan mes como un grupo solido. Na tur, e publico a sa di goza inmensamente di e presentacion di e dos presentacionan aki. Prome cu esey, un seleccion di artista local, cu entre otro guitarista Serghio Jansen, baterista Jeremy Bonnariva y bahista Steba, hunto cu e cantante conoci Watra, a presenta como e asina yama ‘opening act’. Diadomingo ta keda e ultimo anochi unda cu artistanan local NBO ta cuminsa, sigui pa Jill Scott y Lucky Daye.
Tiffany Haddish y Deon Cole a cende e mecha durante e Comedy Night di SBMF 2023
ORANJESTAD – E di 21 edicion di Soul Beach Music Festival a ranca sali diabierna anochi cu e conocido Comedy Night, unda cu comediantenan renombra Mericano ta haci nan presentacion. E aña aki tabata turno di e artista conoci Tiffany Haddish (43), hunto cu Deon Cole (51), ayuda pa e artista creciente Chase Anthony. Haddish ta conoci pa entre otro su pelicula Girls Trip (2017) y pa su accionan filantropico na beneficio di esnan menos fortuna di color. Cole, conoci pa su presentacion den e comedia na television Black-ish tabata mas reserva durante su presentacion, pero asina mes tabata sa di gara e publico di tal forma cu nan no tabata kier a wak e bay. E presentador, tambe un comediante tambe tin su carera hoben su dilanti esta Chase Anthony, pero no ta hacie menos conoci. E tin varios pelicula riba su nomber y tambe ta presenta den salanan yen di comedia. E la sa di anima e dos grandinan, pero tambe a prueba cu e mes tin su peso y cu tin cu tene cuenta cu su futuro briyante su dilanti. E publico a bin pa gosa y tabata notable cu nan tabata fanatico caba di nan, y esnan cu ainda no tabata conoce, a bira fanatico. E festival ta continua awe diasabra anochi, pero ta move pa Renaissance Festival Center unda cu lo tin presentacion di e grandinan mera The Roots, Anthony Hamilton y Watra, presenta pa e conocido comediante Chris Spencer. Mayan diadomingo e festival tin e grandi Jill Scott, y Lucky Daye, y prome cu esey tin NBO cu lo habri e anochi. Atrobe cu presentacion di Chris Spencer. E festivalnan ta cuminsa pa 7’or di anochi.
Women’s Club of Aruba a lansa su website nobo
ORANJESTAD - Cu orguyo Women’s Club of Aruba (WCA) ta anuncia e lansamento di su website nobo, cu ta womensclubofaruba.org. E plataforma digital aki ta marca un logro importante pa club, ya cu e ta fortifica su compromiso pa empodera e hende muhe y crea un cambio positivo den e comunidad di Aruba.
AHATA: Proyeccion pa ocupacion di hotel di 2023 ta 9% menos cu 2019
ORANJESTAD - Aruba Hotel & Tourism Association (AHATA) ta acumula e cifranan di ocupacion y prijs di hotelnan tur luna y CEO di AHATA, Tisa LaSorte, ta raporta cu den luna di April e grado di ocupacion ta un tiki menos cu 2019, pero e RevPAR ta mas halto. Mientras cu recuperacion tabata fuerte den ultimo lunanan, por constata comienso di menos demanda den reservacion pa e ultimo lunanan di aña.
Follow NoticiaCla
