Figaroa: Oferta di APA pa CAO nobo ta rasonable y lucrativo!

ORANJESTAD – Tur ultimo ofertanan di Aruba Ports Authority pa un CAO nobo pa e trahadonan a wordo rechasa pa sindicato FTA. Asina e director di e compania Marc Figaroa (no tin relacion cu Jose Figaroa, presidente di FTA:red) a bisa como prome reaccion riba e accion di  trahadonan diabierna mainta. Segun Marc Figaroa, e oferta di APA ta uno bastante lucrativo y e ta un ahuste salarial cu ta cuminsa na 2024,  y un signing bonus cu ta mas cu esun anterior. Hasta ta willing pa entrega e recorte salarial den un fase transitorio. “Ta un pida bolo tin. Y kico cu bo duna aki, bo tin cu kita di esaya. Ta un bolo tin. Ta esey ta e forza financiero” Figaroa a sigui splica. 

PREOCUPA PA DEMANDA DI TRAHADO

E director a bisa tambe di ta preocupa pa e demanda di e trahadonan pa bin cu un aumento fiho, esta un ‘vast bedrag’, pasobra esey ta uno di 250 florin. “Kico ta pasa cu esunan den e schalering mas abou? Ta un ahuste salarial di mas di 9% pa e schalering abou y pa esun mas ariba unicamente 2%. Y esey ta bay crea un desbalance den bo structura salarial” e director a sigui bisa. Y pesey a ofrece e plan pa e aumento cu e ta considera como proporcional.

OFERTA

APA su director a bisa tambe di tin oido pa e oferta di e trahadonan, cu ta un suma fiho y despues bay over den aumento di percentahe. “Pero e vast bedrag mester ta algo cu APA como compania por carga responsablemente. 

INVERSIONAN GRANDI

A toca e tema tambe cu APA tin cu haci inversion (cumpra edificio ex DOW y desaroyo di Port City:red ) y cu pa esey si lo tin placa. Figaroa a splica cu berdad tin cu haci inversionan grandi pero esey ta pa garantisa e existencia di APA. “Nos oferta ta uno basta rasonabel y lucrativo y mester tene cuenta con e crecemento a bay den e añanan anterior”, Marc Figaroa a bisa. Segun e director, segun e ultimo CAO cu a vence, tabatin un averahe cu tur e componentenan, e trahadonan a crece cu 23%. Y cu e proposicion di e trahadonan, e lo crece aun mas cu 23%. 

A MANTENE TUR HENDE NA TRABOU

Marc Figaroa a recorda tambe cu durante pandemia, no a manda hende cas aunke cu e waf a keda inactivo pa 16 luna. Asina mes a proteha cupo di trabou di tur hende. Apenas aña pasa October cu a cuminsa bek cu e operacion, aworaki caba tin un CAO cu toch ta willing pa duna algo. “Nos no ta nengando pa yuda” e director a finalisa bisando.