Trahadonan di APA NV a bay den accion pa motibo di CAO

ORANJESTAD – Un 40 trahado di Aruba Ports Authority NV (APA) a bay den un accion limita di 2 ora diabierna mainta, pa protesta e proceso di negosacion di Contracto Colectivo di Trabou. Segun e presidente di sindicato FTA. Jose Figaroa, e negosacionan a tranca ora cu a yega na e parti financiero. E accion a pone APA plat pa 2 ora, y si no logra haya otro, lo por intensifica e accionan. Kier cambia e aumento di salario, na forma di porcentahe, envez di suma concreto. E problema ta cu porcentahe, esnan cu ta gana menos ta haya menos, y esunan cu ta gana mas, e porcentahe ta bira automaticamente mas. 

PROPUESTA

Segun Figaroa, e negosacionan tabata cana bon te ora cu a yega e parti di placa. A manda varios proposicion pa otro pero diahuebs tabatin un propuesta final di FTA, cu no a wordo acepta door di APA, y unda APA lo a indica cu no tin mas espacio pa sigui move. “E ora nos a yega na un impasse” Figaroa a sigui bisa. 

DOS PALABRA

Loke ta e problema tambe ta cu paden, ta bisa cu no tin placa pa trahado, mientras cu ta Sali publicamente bisa cu ta bay expande, ta bay cumpra edificio, desaroya un Port City, pues ta mustra cu tin placa pa esey, pero no pa paga trahado. E presidente di sindicato ta spera cu e mensahe yega cerca e compania pa medio di e accion aki, pa partidonan yega na otro. Ta trata di un aumento di 3% cu ta pidi, pero cu lo no kier duna. Segun Figaroa, partidonan no tabata mucho leu di otro.