Arends: Abogado Ronny Wix no ta candidato mas pa bira Minister na Merca

ORANJESTAD – Diamars atardi minister Ursell Arends a confirma cu e candidato apunta pa e partido Raiz pa bira minister plenipotenciario na Merca, abogado mr Ronald Wix, no ta e candidato mas. Hopi mas detaye e mandatario no kier a duna riba e tema, cu solamente confirma cu e no ta candidato mas y cu ta andando cu e proceso pa haya un otro candidato aworaki. E motibo pa cual Wix no ta candidato mas, no ta conoci. Noticiacla a haci intento pa haya e reaccion di e abogado mes, pero no a haya reaccion (ainda). Otro medionan a raporta cu Wix a opta pa e keda como abogado, mientras cu riba caya ta papia cu e lo no a pasa e screening. Pero nada di esey no ta confirma, sino cu solamente e no ta e persona mas pa e funcion. 

ASPIRA 

Tabata na luna di September di aña pasa (2022) cu e abogado a confirma na e portal aki cu e la acepta e reto y cu e proceso ta canando pa e bira e siguiente minister plenipotenciario, reemplazando e actual minister, Josline Croes. E noticia tabata cu e intencion tabata pa sr Wix inicia su funcion nobo den di dos cuartal di 2023, mas bien entre april y mei di e aña aki 2023. Mientrastanto e tempo ey lo a pidi sra Croes pa keda den funcion te fin di aña pasa (2022), pa tur cos keda regla di un forma mas nechi. Ademas e abogado e tempo ey a te hasta confirma na e portal aki cu sra Croes lo tabata cooperando hopi bon cu e transision aki tambe.