Por lo pronto no tin barco di Venezuela pa Aruba, aunke a habri frontera

ORANJESTAD – Mientras cu Aruba a habri frontera cu Venezuela atrobe dialuna 1 di mei 2023, no mester spera accion na Barcadera por lo pronto. Fuentenan di noticiacla na Punto Fijo, a confirma cu ta despues di dia 8 di mei numa, por spera algo di barco. Pa cuminsa, ta despues di dia 8 di mei, e prome dos embarcacionan lo sali di La Vela, pa Corsou, y despues ta inicia operacion pa Aruba. Pues ni Corsou cu a habri su frontera for di luna pasa, no a haya bishita ainda di Venezuela, for di laman. Siman pasa si un avion di Albatros a yega Corsou como e prome buelo di Venezuela, desde cu a habri e frontera luna pasa cu e isla ruman. 

FRONTERA

Tabata dialuna (ayera) cu despues di 4 aña, Aruba a habri frontera maritimo bek cu Venezuela. Esun aereo ta keda cera por lo menos cu 3 luna mas, esta fin di July, conforme e decreto cu a keda pasa siman pasa di forma practicamente automatico. Cada tres luna automaticamente Aruba a bin ta prolonga e ciere di frontera cu Venezuela, aunke cu e diferencia siman pasa tabata cu a prolonga solamente esun aereo.