Van Huffelen: Refinanciamento di debe ta mara na acuerdo di RAFT

ORANJESTAD – Si Aruba kier e posibilidad pa refinancia su debe cu e tin cu paga na October awor, e tin cu bay di acuerdo cu e ley di RAFT. Esey ta un condicion cu Hulanda a pone sin mas y cu e siman aki secretario di estado Hulandes Alexandra van Huffelen a recorda Tweede Kamer den un carta diamars (25 april 2023). Na februari di e aña aki a haci mas cu dos aña cu e ley a keda presenta na Aruba y ainda no tin decision. Y esey a pone cu Tweede Kamer su pasenshi ta cabando. Despues di dos carta tras di otro (e ultimo siman pasa dia 20 di April), e secretario di estado Alexandra van Huffelen ainda no por contesta Tweede Kamer. E ta confirma si cu Parlamento di Aruba ta e problema, pasobra nan no ta di acuerdo cu e RAFT. 

CARTA DI TWEEDE KAMER

Diaranson Van Huffelen a contesta Tweede Kamer riba nan pregunta di ‘con a para’. Van Huffelen sinembargo mester a informa cu e no tin contesta ainda. “  Un contesta riba bo(so) peticion aworaki no ta posibel” van Huffelen a cuminsa na contesta. E la recorda Tweede kamer cu e RAFT (Rijkswet Aruba Financieel Toezicht) ta un asina yama ley di consenso. “ Esey kier men cu Aruba mester sostene e proposicion” e mandatario a sigui splica. “A base di e raportahenan entrega, gobierno di Aruba a laga sa cu Parlamento no tin consenso pa e proposicion” e mandatario a sigui bisa.”Na e momento aki, mi ta den combersacion ainda cu gobierno di Aruba, unda cu supervision financiero via un Rijkswet, ta relata na e refinanciamento di e prestamo di Aruba”, e mandatario a bisa. Aruba mientrastanto recientemente a confirma cu ‘Hulanda a aproba pa refinancia e debe pendiente”. No ta conoci si e declaracion aki tabata prematuro of ki consecuencia e declaracion di e siman aki di e mandatario Hulandes por tin riba e declaracion di Aruba. 

KICO TA PASA SI ARUBA NO APROBA RAFT

Anticipando e problemanan, Noticiacla a tuma contacto recientemente cu BZK na Hulanda. A compronde e ora cu si nan (Aruba) opta pa no bay pa e RAFT, e ora e Hulanda no ta refinancia e prestamo y e ora Aruba mester cera un prestamo cu un instituto financiero internacional, pero pa cualkier prestamo internacional cu gobierno di Aruba kier cera, e mester di aprobacion prome di Conseho di Minister di Reino Hulandes. Ademas a splica e tempo ey (ora cu e portal aki a haci e pregunta, e mandatario di finanza di Aruba tabata na Merca buscando financiamento), a splica cu e minister di finanza por tin combersacionan cu cualkier banco internacional pa cera prestamo, pero finalmente, e mester haya aprobacion si. E aprobacion no ta dificil, pero ta mas bien pa sigura cu e ta ‘ok’ y cu mas importante, e no ta perhudica y influencia otro prestamo di e otro paisnan den Reino Hulandes, segun BZK a confirma un biaha mas pa Noticiacla. Pa loke ta e bishitanan cu e mandatario di Finanza Xiomara Maduro a haci  na Merca recientemente, a compronde cu e situacion ta cu e minister por tin combersacion cu banconan na Merca (of Hulanda). “Solamente den caso si Aruba ke hasi un fiancia den exterior, dus pafo di reino, nan mester haña permit di Rijksministerraad” BZK a sigui bisa.