Helena Croes: Derecho di Naturalesa ta parti esencial di pensamento indigena

ORANJESTAD - Derecho di Naturalesa ta parti esencial di pensamento indigena. Asina miembro di Aruban Warriors/Movemento Indigena Arubano mr. drs. Helena Croes a bisa den su comunicado. Segun Croes, diasabra ultimo a tuma luga un conferencia insolito. “Minister di Naturalesa Ursell Arends a start su campaña politico pa purba scapa caida inevitabel di su partido. Aparte di un par di candidato den su circulo cu a haya chupabebe, niun hende no ta kere mas” Croes a sigui bisa. Segun Croes, desde cu Arends a join Mep el a see the world y mientrastanto naturalesa na Aruba ta wordo destrui mas cu nunca. Ursull a bay di acuerdo cu EAGLE LNG-pipeline y cu mas hotel bou gobierno di MEP/RAIZ. Croes ta sigui bisa cu na 2017 nativonan indigena a hiba un lucha feroz contra un pipeline na Merca. Protestanan grandi a tuma luga na Standing Rock contra e pipeline. Nos ta asumi cu Ursull a keda keto na UN tocante e EAGLE LNG pipeline bou su gobierno na Aruba paso e indiannan lo a core cune di e sala di conferencia y/of lo a yena su curpa cu flecha figurativo. 

“ Sigur e no a contanan tampoco cu su colega Dangui ta destrui nos tera sin piedad den nomber di progreso. Pero desaroyo pa ken? Pa su circulo intimo? Pueblo no ta sinti cu tin progreso den nos cartera y riba dje nos pais ta wordo destrosa y prostitui pa probecho personal” Croes ta sigui bisa. Ademas, Croes ta sigui bisa, derecho di Naturalesa ta forma parti esencial di e pensamento indigena. Respet pa naturalesa ta prevalece riba cualkier beneficio capitalista. “Nos no por come placa.  Gobierno no ta ni capas di enforsa nos leynan actual di naturalesa corda pa enforsa un ley mas compleho. Y nos ta puntra nos mes ta ken te famoso stakeholdernan? Niun ambientalista ni NGO real a wordo invita. Solamente algun wannabe activista oportunista cu ta manera cameleon; esakinan ta haya puesto clave bou tur gobierno. Nos tur conoce e tipo di hendenan aki y sa ta ken nan ta” Croes a sigui bisa. Segun Croes, nan sa exactamente con pa maniobra den sombra di mandatarionan, sunchi nan pia manera catibo y carga nan tas. “ Nos di Aruban Warriors/Movemento Indigena Arubano ta mira algun desaroyo basta preocupante ta tumando luga den gobierno MEP/RAIZ. Tur cos ta hole malversacion di placa publico y/of di fondo internacional destina na pueblo Indigena Arubano. Y e problema ta surgi ora cu despues cu gobierno baha, pueblo mes mester paga pa OM por investiga posibel corupcion cu a tuma luga cu nos placa. Niun hende ta scapa su destino” e la finalisa bisando.