Yiunan di politiconan prominente sentencia na trabou comunitario

ORANJESTAD – Den su ausencia diabierna atardi, yiu homber di prome minister Evelyn Wever Croes, Kevin Wever diabierna atardi a keda sentencia na un castigo di 40 ora di trabou comunitario pa su participacion ( a pidi 150 ora) den e caso di violencia publico conoci como caso Flor diabierna kitando e castigo preliminar cu e la haya caba (1 dia deteni osea ta kita 2 ora di e trabou comunitario) . E otro sospechosonan, e rumanan Chris y Nigel Williams, cu ta yiu di otro politico, esta Micheal Williams, sinembargo a haya e castigo mas pisa cu Wever, cu ta 120 y 160 ora di trabou comunitario respectivamente (a pidi 150 y 180 ora), kitando e tempo cu nan tabata cera caba, cu ta 2 y 3 ora respectivament y finalmente, e ultimo sospechoso di fam Torres Mendez (cu tampoco tabata presente den corte diabierna) a haya e castigo mas pisa cu tur, di 180 ora di trabou comunitario (a pidi 240 ora) kitando 10 ora ( e la sinta 5 dia den prison) ya cu ademas di violencia publico, e la causa lesion severo na un persona. 

E CASO 

Pa cuminsa, mester bisa cu e tipo di caso aki di violencia publico normalmente lo no a haya asina hopi atencion, esta pelea entre dos (grupo di) persona(nan), unda cu tin destruccion y herido. Pero como cu den e caso aki tabata trata di yiunan di politiconan activo, entre nan yiu di prome minister actual y yiunan di un otro politico, e caso a haya hopi mas atencion cu normal. 

SENTENCIA

Bek pa e sentencianan reparti, mester añadi cu e rumanan Chris y Nigel Williams fuera di trabou comunitario, a haya tambe 1 luna di castigo condicional di prizon cada uno, y Torres Mendez 2 luna. Atrobe, pasobra Torres Mendez tabata esun cu a causa mas daño. yt Huez a sentencia tur 4 sospechoso den caso penal Flor na un of otro castigo, variando di castigo condicional di prizon te na trabou comunitario diabierna. 

ARGUMENTO DI HUEZ

Huez a cuminsa na splica diabierna, ki ora por condena un persona pa violencia publico, teniendo cuenta cu hurisprudencia legal. Aki e la mustra cu den combinacion di video y testimonio y mas declaracion, a keda legalmente proba cu tur cuater persona a comete violencia publico, y di un forma significante. Huez a repasa e suseso unda cu a keda demostra cu esnan cu a cuminsa e problema den e club nocturno Azzia, tabata Nigel Williams cu a dal Kevin Wever un mokete. Esaki a causa un bringamento entre dos grupo diferente, unda cu tabatin tambe tiramento di obheto, variando di glas, y boter, creando chaos den un lugar turistico elegante, cu prome cu esey, tabata mustra un lugar trankilo relaha. Mientras cu Wever no a cuminsa e pelea y of disturbio, e no a actua di tal forma pa por a trankilisa e situacion, sino a opta pa sigui esnan cu a inicia esaki y te hasta tira stul riba e contrincante. E argumento di defensa propio, di parti di abogadonan di Wever y Torres Mendez a keda rechasa pa e huez, debi na e actuacionan cu ambos tabatin. Mientras cu Ministerio Publico a acusa e sospechosonan di destruccion material, cu posibemente por a aumenta e castigonan, huez a rechasa e demanda aki ya cu mientras ta mira cu tabatin tiramento di obheto, cu excepcion di un lampi, no tin prueba ken a kibra kico e anochi ey. Pa e motibo ey, huez a declara tanto rumanan Williams como Wever liber di e acusacion di destruccion. 

KOKI HERIDA

E sospechoso cu a haya mas castigo, Torres Mendez tabata pasobra e la causa lesion severo na un persona, den e caso aki e koki A.H. cu mester a haya 22 cosi (stitches) pa su herida causa na su brasa. Den e caso aki, e koki a pidi 13 mil florin na daño y perhuicio, pero huez a reduci esaki te na 3.500 florin di daño. 

DAÑO PA ARUBA

Loke ta pisa tambe den e sentencia, ta e hecho cu e ta mishi cu e sentido di seguridad di un comunidad, y cu e por ta dañino pa imagen di Aruba, como destinacion turistico, riba cual economia di Aruba ta conta y ta basa grandement. “Turistanan mester por confia cu nan por disfruta trankilamente di nan vacacion na Aruba” e huez a splica. Algo cu a keda afecta durante e anochi den cuestion, manera e imagenan di video por a mustra den corte. Un anochi cu a cuminsa trankil, a caba den un chaos, cu tur hende, incluyendo turistanan na careda e anochi ey, sin paga cuenta, y lagando un lugar destrui atras. Pa loke ta e condena, tur sospechoso condena tin 2 siman di tempo pa apela e sentencia.