Na Corsou, entrada di ministernan ta bai bek na normalidad

WILLEMSTAD - E salarionan di tantu ministernan, pero tambe parlamentarionan lo bai bèk na normal entrante dia 1e di yüli 2023. Den e mesun ámbito aki sindikatonan ta negoshando pa nan miembronan haña bèk loke ainda a keda atras dje entrega. Esei EXTRA a komprondé for di un “Publicatieblad” ku nos a tuma nota di dje i tambe for di kòmbersashon ku e presidente di ABVO, sr. George Hernandez.

Manera ta konosí for di yüli 2020 tantu ministernan komo parlamentarionan a entregá parti di nan entrada (25%) pa dje forma ei demostrá solidaridat ku empleadonan públiko ku tambe a entregá.

Publicatieblad

T’asina ku nos por a tuma nota di un “Publicatieblad”, ku ta un partisipashon ofisial na momentu ku ta bai tin kambio den un lei òf un lei nobo ku ta drenta na vigor. Den e kaso aki a base di un dekreto a disidí riba redukshon riba entrada di polítikonan gobernante, i komo tal a saka un otro dekreto awor ku ta anunsiá ku e dekreto lo kaduká dia 30 di yüni 2023, loke a nifiká ku pa dia 1e di yüli 2023 e provishonnan finansiero i inmaterial manera dianan di fakansi lo bai bèk na normalidat. Ku esaki e entrega a base dje prinsipio di solidaridat ta kai.

Mas aleu EXTRA a sostené un kòmbersashon ku sr. Hernandez di ABVO pa sa kiko ta status dje provishonnan di ámtenarnan, i el a splika ku ta konosí ku e for di 1e di yüli 2022 empleadonan públiko a mira e 12.5% bèk riba nan entrada, aunke tin algun punto mas ku ABVO huntu ku otro sindikatonan ta deliberando ariba ku gobièrnu pa nan keda restablesé.

Segun sr. Hernandez, den e kaso aki por papia di ‘periodiek’; tambe indeksashon di añanan 2018 i 2019 ku nan tin derechi riba dje; 1 ½ dia di fakansi di aña 2022 ku nan tin di haña bèk; i finalmente e pago di plaka di fakansi ku tin di sigui kore atrobe e aña koriente. NOTA: E texto ta scirbi den Papiamento fonetico di Corsou.