OM a stop, pero gobierno si ta sigui investiga irregularidad cu otorgacion di tereno

ORANJESTAD – Ministerio Publico no ta sigui investiga riba   iregularidadnan den otorgamento di terenonan, pero gobierno di Aruba si. Esey tabata e mensahe diahuebs cu gabinete Wever Croes II a informa. Tabata Ministerio Publico cu a informa cu falta di prueba pa haci un investigacion penal a pone cu nan a para esaki, aunke cu nan a hala atencion di e minister en cuestion di su actuacion riba e tereno, esta minister Glenbert Croes.  Segun gobierno, awor cu Ministerio Publico no ta continua, e diferente investigacionnan interno disciplinario por continua. Autoridadnan a tuma paso inmediatamente y por spera mas accion den e simannan nos dilanti. E portal 24ora mientrastanto a raporta cu un trahado ya caba a keda suspendi mesora diahuebs y prohibi pa drenta DIP. E lo ta ta parti responsabel pa cosnan irregular, segun e portal 24ora a raporta. 

IREGULARIDAD

Gobierno a sigura diahuebs cu segun nan, ta un hecho conoci cu den ultimo añanan tabata tin hopi iregularidad cu otorgamento di tereno.” Hues a confirma esey tambe den e veredicto den caso Avestrus. Hopi ciudadano a wordo perhudica pa esaki, mirando con scaars terenonan na Aruba a bira. Hopi famia no por haya tereno pa construi nan cas. Y esey a conduci na varios investigacionnan interno, entre otro riba otorgamento di terenonan comercial y di huur, y tambe casnan otorga na Seroe Colorado. Awor e investigacionnan ey por continua y ta di spera cu nan termina lihe pa DIP por bay bek na orden di dia” e articulo di gobierno a sigui bisa. 

SCAPA

Segun Gobierno, cu esaki por conclui cu talves esnan envolvi por a scapa di investigacionnan penal, pero demas investigacionnan ta continua.