Aruba kier explora gas hunto cu Corsou, pero Corsou no ta mustra interesa

ORANJESTAD – Mientras cu Aruba ta haciendo esfuerso pa logra un intento mas pa explora gas, e biaha aki entre Aruba y Corsou, Corsou mes no ta mustra mucho interesa den esaki. Por lo menos asina ta parce segun un raportahe recien publica den e portal Hulandes Trouw. E portal ta referi na e anuncio di e minister di Energia di Aruba Glenber Croes, di e intencion pa explora gas entre e dos islanan. E portal Hulandes sinembargo ta recorda cu esaki tabata un pensamento di basta tempo pasa caba di gobiernonan anterior di Corsou. Pero e gobierno actual, sea no ta interesa of no tin mucho interes riba e tema. 

PASADO

E portal Hulandes ta recorda cu ta for di 2008 cu e tempo ey presidente di Parlamento Pedro Atacho di Corsou a tene un conferencia di prensa riba e tema, refiriendo na un rapport confidencial cu tabata papia di e posibilidad pa tin gas den e awa rond di Corsou. E base tabata un investigacion sismico dos dimensional den e parti zuidwest di Corsou, direccion Venezoela y e parti west den e direccion di Aruba. Despues cos a keda keto, te cu na 2010 a desmantela Antias. Aruba tabata bezig caba cu e exploracion den su area, debi cu e tera rond di Aruba tabata basta superficial, esta, no mucho hundo y mas facil pa explora. E exploracion a resulta envano e tempo ey. E prome minister di algun tempo atras, premier di Corsou Rhuggenaath a mustra interes atrobe y pidi pa trece bida den e compania ‘morto’ KPG, Kompania di Petroli y Gas. A nombra Clift Christiaan como hefe, y tabatin como meta pa atrae partidonan interesa pa bin bora pa gas. Algun a bin, pero sin mucho interes. Despues Covid a dal y tur cos a para. 

GABINETE PISAS

Un compania nobo a meld su mes e ora pa explora gas, pero e premier actual Pisas lo no a mustra interes y no a reacciona riba yamada di e director pa haci algo. E ora e director a tuma contacto cu Aruba pa e posibilidad di explora gas hunto. E no tabata kier pa ambos cuminsa bora independientemente, cada uno na nan banda di e laman. Esey ta genera problema y guera y esey no ta beneficia ningun hende. Bek pa e interes di Corsou, e director di e compania, segun e relato den Trouw, no a mustra interes at all. ‘ Mi a scirbi varios memo, y email na e premier pa mustre di e desaroyo entre Aruba y Corsou, pero te awor e no a reacciona riba ningun di e peticionan”. Esey a pone cu e la tuma retiro y e compania actual ta uno morto, sin placa, sin personal y sin hefe. 

GLENBERT CROESNo ta conoci si e minister di Aruba si ta bay logra crea interes cu coleganan di Corsou e biaha aki, y cu di su banda, e logra haya Pisas of otro gobernante di Corsou interesa suficiente pa sigui cu e plan. Sino ta mustra cu Aruba kier haci algo, pero cu COrsou ta sigui desinteresa. Y esaki ta interesante mirando cu awor e minister di Aruba a anuncia cu tin interes pa explora entre Aruba y Corsou. NOTA: Contenido di e articulo ta cu colaboracion di Dick Drayer/Trouw. Potret ta cortesia di Dick Drayer. 

  .