Gobierno di Aruba a reconoce fotografo prominente Hulandes Nico van der Ven

ORANJESTAD - Prome Minister Evelyn Wever - Croes conhuntamente cu Minister Plenipotenciario Ady Thijsen a ricibi sr. Nico van der Ven na Arubahuis, un fotografo prominente cu desde aña 1968 ta asistiendo Aruba, Antia y diferente lider politico di Aruba na Hulanda, pa brinde un reconocemento.

Sr. van der Ven semper a yuda gobernantenan di Aruba cu tabata na Hulanda y e tin hopi recuerdo bunita di Aruba. E siman aki a invita sr. van der Ven na Arubahuis pa dune un reconocemento pa e gratitud cu ta sinti pe como Aruba y representante di Aruba, pa e trabou grandi cu el a haci na Hulanda semper. 

Den e combersacion sr. van der Ven a conta algun anecdota,  y un di nan cu a hala atencion di Prome Minister Wever - Croes ta ora cu el a encontra cu sr. Betico Croes den feliz memoria, na Den Haag. Sr. van der Ven a conta cu el a topa Betico sinta den un luga scur den un huki hopi tristo. Y ora cu el a puntra Betico kico a pasa, Betico a bise cu e ta haya falta di su yiunan. “Esey ta algo cu bo ta relaciona cu ne sigur ora cu bo ta hopi tempo leu for di bo famia”, Prome Minister a expresa. 

Den nomber di Gobierno di Aruba, premier Wever Croes a gradici Nico van der Ven pa su asistencia di semper, dunando e un bunita reconocemento den forma di un moneda.