Aruba y Hulanda a inicia reunion riba nivel di gobierno riba refinanciamento di debe

ORANJESTAD - Diaranson 5 di april, Prome Minister Evelyn Wever-Croes hunto cu Minister Xiomara Maduro y ekipo financiero y huridico di Aruba a reuni cu Secretario di Estado Alexandra Van Huffelen y su ekipo. Esaki tabata e prome reunion riba nivel di gobiernonan na unda cu a trata e tema di refinanciamento di e debe grandi cu Aruba tin. Aruba a fia 916 miyon florin cu ta hopi placa. E debenan aki lo madura na oktober 2023 y p’esey ta importante pa hiba e conversacionnan aki awo pa yega na acuerdonan riba e repago di e debe.

VAN HUFFELEN

Secretario di Estado van Huffelen a anuncia comienso di aña cu na februari lo cuminsa cu e combersacionnan aki. Mientras tanto a tuma luga hopi combersacion riba nivel ambtelijk cu e ekiponan di nos profesionalnan y awo esaki tabata e prome reunion riba nivel di gobiernonan. 

MESTER MAS REUNION

“E tabata un bon reunion. Naturalmente mester mas di e reunionnan aki. Aruba awo ta enfoca tambe pa finalisa nos memorandum financiero y economico cu actualmente nan ta trahando na Aruba riba dje pa asina por determina e capacidad di pago. Durante e reunion nan a indica unda nan lo por yuda nos. Awor nos sa kico mester haci y lo sigui dialoga”, Prome Minister a duna di conoce.