ELMAR: Problema den trafohuis a causa interupcion di coriente na Ponton diamars

ORANJESTAD  - Un problema den trafohuis a causa interupcion na Ponton diamars. ELMAR a informa cu ayera, 4 di april pa 8:05 PM, nan a confronta un problema cu e suministro di coriente den e area di Ponton y vecindario. Esaki a resulta den un interupcion di servicio pa varios cliente.

“ Nos a confronta un problema den un trafohuis cu a afecta e suministro di coriente. Na momento cu a detecta esaki, nos ekipo tecnico a traha duro pa soluciona e problema aki” e vocero Audrey Croes a splica. 

Pa 8:36 PM nan a cuminsa reestablece suministro di coriente den e area di Paradijs.  Pa 9:39 PM, nos a logra reestablece e suministro di coriente den mayoria area afecta, incluso Tanki Flip, y un parti di Ponton.

Lamentablemente cu tur esfuerso haci, no a logra reestablece suministro di coriente den e otro parti di Ponton a mismo instante. E trabou tabata mas complica di loke a spera, y asina aki riba 5 di april pa 5:12 AM, e suministro di coriente a ser reestableci den e area aki. Actualmente, tur area tin suministro di coriente.

“ Nos ta hopi consciente di e incomodidad cu esaki por a causa. Nos ta pidi nos clientenan pa compronde cu esaki tabata un situacion imprevisto” Croes a sigui bisa.

" Nos ta sigui monitoria e situacion y aprecia comprension di tur nos clientenan. Por conta cu nos ta haciendo tur cos den nos poder pa evita cu situacion manera esaki ta ripiti den futuro” e la finalisa bisando.