Premier Wever: Corda cuida nos playanan y naturalesa

ORANJESTAD – Premier Evelyn Wever Croes a pidi pa comunidad e dianan aki corda cuida nos playanan y naturalesa. Esaki den cuadro di  e temporada conoci na Aruba di campamento. E mandatario a recorda comunidad riba e importancia di nos beachnan. Ban cuida nos naturalesa pa nos por gosa di dje pa hopi aña mas.

TRIPADVISOR

Poco tempo pasa Eagle Beach Aruba a gana un reconocemento di Tripadvisor, como e playa number 1 den Caribe y number 2 na mundo. Eagle Beach ta un playa sumamente importante pa Aruba su turismo, e ta bunita, e ta amplio y e ta un sitio cu tur hende por bay relaha. E reconocemento di Eagle Beach ta algo cu a logra hunto como comunidad, y pues e ta hopi importante pa hunto sigui mantene, y percura cu e ta keda e bunita beach manera cu e ta, Prome Minister Wever - Croes a expresa.  

Aworaki drentando temporada di campamento, ta haci apelacion na un y tur pa gosa di naturalesa y nos playanan pero ban cuide tambe. A drecha e beachnan pa tur hende haci uzo di dje, awo ban percura pa cuide pa asina tin hopi aña mas di goso y probecho di dje, Prome Minister a termina bisando.