E di 40 edicion di Fiesta Rotaria ta diadomingo awo

ORANJESTAD  – Loke e pueblo ta gusta asina tanto y tabata warda riba dje ta diadomingo awo 2 di april riba parkeerplaats di Stadio Guillermo Prospero Trinidad. Entre 10’or di mainta y 6’or ta spera un y tur pa pasa bishita e grandioso Fiesta Rotaria cu Rotary Club of Aruba ta organisa pa di 40 biaha.

Durante un conferencia di prensa ofreci diamars mainta, president di Rotary Club of Aruba, Shelby Maduro a splica cu e evento, riba su mes, ta un tradicion pa hopi caminda mientras bo ta yuda otro, bo ta yuda bo mes tambe. Fiesta Rotaria ta un actividad cu, a traves di un grandioso bazaar y feria, ta recauda fondo cu ta bay completamente bek na diferente fundacion riba nos isla. E meta pa e aña’ki ta pa alcansa e suma di 400 mil florin!

Esunnan cu yega trempan ta bebe awa limpi for di e diferente stand cu tin manera esun di supermarket cu comestibel y esun di paña. Tambe tin stand cu gran variedad di mata y nada menos cu nuebe container cu articulo pa cas. Tur e articulonan aki ta bay na prijs di baca flaco cu no por keda sin probecha.

For di Luis Oduber, chair di e comision organisado di Fiesta Rotaria por a compronde cu diversion tambe lo tin na granel diadomingo  ya cu tin area pa mucha cu diferente entretenimento manera dino jump, carrousel y pintamento di cara. 

Bar y cushina lo ta bon surti durante henter dia cu pasaboca, cos dushi, fried rice cu sate, pasta cu garlice bread y te hasta un bon BBQ pa asina tur hende pasa un diadomingo dushi den compania di famia of amigo. Sin duda ambiente lo ta formal cu diferente presentacion y musica.

Adicional na e Fiesta Rotaria, tambe e club social ta bendiendo rifa for di den luna di januari caminda e prome premio ta un auto completamente nobo, un Chevrolet Groove 2023. Cada ticket ta costa solamente 25 florin y ademas di e auto, bo tin chens pa gana diestres otro premio atractivo. E sorteo di e rifa lo tuma luga diadomingo atardi na e Fiesta Rotaria y den presencia di notario.