Aeropuerto di Auba a yama British Airways bonbini

Posted on 03/27/2023 4:01 pm AST | Updated on 03/27/2023 4:03 pm AST

ORANJESTAD – Manera ta conoci, diadomingo a inaugura un vuelo pero cu dos destinacion. Despues di como dies aña di negosacion y preparacion, Aruba Airport Authority N.V. (AUA Airport) a yama bonbini na e prome vuelo di British Airways, cu desde awo ta bula pa y for di Aruba dos bes pa siman, riba diahuebs y diadomingo. Cu e logro aki AUA Airport ta sigui desaroya e continente Europeo, Caribense y sin lubida…ta diversifica e mercadonan cu ta sirbiendo awo for di nos isla.

British Airways lo bula pa Aruba durante henter aña riba diahuebs y diadomingo cu un stop na Antigua. E vuelo LGW-AUA lo ta opera cu un Boeing 777-200ER ekipa cu 336 asiento, brindando 32 asiento Club, 52 World Traveller Plus asiento y 252 asiento economy. E ta sali for di London Gatwick Airport.

DETAYE DI E VUELO

Vuelo BA2157 Depart London Gatwick 10:00 – Arrive Antigua 13:35

Vuelo BA2157 Depart Antigua 14:35 – Arrive Aruba 16:30

Vuelo BA2156 Depart Aruba 18:30 – Arrive Antigua 20:15

Vuelo BA2156 Depart Antigua 21:15 – Arrive London Gatwick 10:15

N’e momento aki e mercado di Europa ta conta cu servicio di KLM y TUIFly Netherlands, ambos operando for di Amsterdam y tambe TUI Airways cu servicio di temporada durante zomer so for di London Gatwick.

CEO di AAA, Joost Meijs, a comenta: Otro logro pa e industria turistico di nos isla cu un servicio permanente entre London Gatwick Airport y Aruba. E introduccion di e servicio directo aki ta un obhetivo cu nos a bin ta traha riba dje y ta encanta cu e esfuerso pa desaroyo di servicio ta duna resultado. Den un sector hopi competitivo, ta esencial pa tin un servicio directo durante henter aña y conexion facil for di mercadonan grandi. Esaki ta un trabou den ekipo y mi ta convenci cu e lo bira un exito!”

TOCANTE LONDON GATWICK AIRPORT

London Gatwick Airport (LGW) ta un aeropuerto internacional grandi situa cerca di Crawley, West Sussex, Inglatera, aproximadamente 29 miya (47 km) pazuid di London central. LGW a maneha 6.9 miyon pasahero na aña 2021 y prome cu Covid a maneha riba 46 miyon Pound. Gatwick tabata e prome aeropuerto pa tin un conexion di trein principal cu su mesun stacion conectando cu mas stacion di aeropuerto na Europa. Ta tuma 30 minuut pa yega centro di London den trein cu ta sali cada 3 minuut.

TOCANTE BRITISH AIRWAYS

British Airways ta e aerolinea cu ta carga e bandera di Inglatera. A fund’e dia 25 di augustus 1919, esta 103 aña pasa como Aircraft Transport and Travel Limited y riba dia 31 di maart 1974 (48 aña pasa) a cambia su nomber pa British Airways. E tabata un aerolinea perteneciendo na gobierno y cu nan a privatisa na 1987.

British Airways tin su sede na Waterside, cerca di e base principal di operacion situa na e aeropuerto Heathrow na London. British Airways ta conta cu un flota di 257 avion, ta bula pa 183 destinacion. Nan programa “frequent flyer” yama Executive Club/Avios.

British Airways ta forma parti di One World Alliance hunto cu 12 otro aerolinea, cu ta: Alaska Airlines, American Airlines, Cathay Pacific, Finnair, Iberia, Japan Airlines, Malaysia Airlines, Qantas, Qatar Airways, Royal Air Maroc, Royal Jordanian y SriLankan Airlines, sin lubida Fiji Airways como un Oneworld Connect partner.

  • Powered by SETAR