DOW: Construccion ta cuminsa di proyecto pa mehora sistema di drenahe na Palm Beach

Posted on 03/23/2023 3:06 pm AST | Updated on 03/23/2023 3:10 pm AST

ORANJESTAD - Departamento di Obra Publico (DOW) a informa tocante un construccion cu lo bay tuma lugar den e area di Palm Beach. E construccion ta pa mehora e sistema di drenahe di awa di yobida y tambe pone un capa di asfalt nobo. 

E construccion akinan lo wordo haci den fase:

- Fase 1: Mehora e drenahe dilanti CITGO Palm Beach y renoba e asfalt for di CITGO Palm Beach te cu Botica Santa Anna.

Fase 1 ta wordo dividi den 3 differente seccion.

Seccion 1: Cobamento pa aloca tubo, trabou di concreto y conecta e drenahe na e baki di PalmAruba Condos.

E area lo ta cera pa trafico 24/7 pa 30 dia di trabou.

Seccion 2: Frees (kita) e capa di asfalt for di CITGO te cu Botica Sta Anna.

E caminda lo ta parcialmente cera pa tur trafico for di 11’or di anochi pa 7’or di mainta pa 4 dia di trabou, durante dia caminda ta habri pa trafico.

Seccion 3: Asfalta e caminda for di CITGO te cu Botica Sta Anna.

E caminda lo ta completamente cera pa tur trafico for di 9’or di anochi pa 12’or di merdia pa 1 dia di trabao, caminda ta habri back 12’or di merdia.

Fase 2    Amplia e capacidad di awa y structura e muraya di e duiker na e crusada di e Tanki na Palm Beach.

Fase 3    Amplia e capacidad di awa na e duiker di Keito.

Fase 4    Asfalta y mehora e fluho di awa na e caminda di tera na haltura di Palm Beach 94B.

E trabounan di Fase 1 lo cuminsa dialuna awor dia 27 di maart 2023 y lo tin un duracion di 35 dia di trabou (dialuna pa diabierna). Segun e trabounan di fase 1 ta avanzando, lo anuncia e fecha di e siguiente fase nan.

En conexion cu esaki, Departamento di Obra Publico ta haci un peticion na tur automobilista y peaton pa tene cuenta cu e trabounan cu lo bay tuma lugar. DOW ta pidi tur automobilista, negoshinan y otro usuarionan comprencion durante e contruccion cual nan ta pidi disculpa.

  • Varadero
  • Powered by SETAR