- Departamento di Progreso Laboral (DPL) cu campaña pa entrega Formulario AMR 2023 den luna di Juni 2023
- Directie Financiën ta informa di e condicionan ora di trata cu cobransa pa instancianan di Gobierno
- Foyeto Abo ta bay studia dentro di poco na Hulanda – con pa registra den BRP
- DUCAPRO a presenta un plan pa promove e industria creativo y proteha e artistanan
- E prome barco di fruta y berdura di Venezuela ta yega Aruba dialuna awor
Huez a pospone caso di maltrato entre yiunan di dos politico pa aki dos siman
ORANJESTAD – Corte a wanta/pospone e caso di maltrato entre dos yiu di dos politico di Aruba diahuebs mainta, debi cu dos (di e cuater) sospechosonan sea no por tabata presente y of a cambia di abogado ultimo ora. Ta trata di e caso unda cu yiunan di dos politico (un ta yiu di Prome Minister Evelyn Wever Croes y e otronan di politico Micheal Williams) lo a agredi otro fisicamente, causando daño y destruccion y heridando un chef di un restaurant local na 2021. E caso awor ta tuma lugar dialuna mainta 3 di April 2023. E ta remarkable mirando cu ta netamente e yiunan Williams cu no por a presenta y of a cambia di abogado a bringa pa e caso tuma lugar envez di un otro alternativa, pa awor resulta cu ta net pa motibo di nan dos, e caso no por sigui. Di otro banda mester bisa cu e motibo por ta fuera di nan alcanse unda cu abogado a cambia ultimo ora y e otro sospechoso a perde avion. No ta conoci pakico e la perde e avion.
WANTA E CASO
E mainta a cuminsa cu presencia di e yiu homber di prome minister, esta e sospechoso K. Wever cu si a presenta, y for di Hulanda via videolink, e sospechoso Torres Mendez. Aunke cu e sospechoso C. Williams tabata den corte, e no por a presenta pasobra su abogado nobo, no tabata cla pa trata e caso di su cliente. E abogado, sr Rozenstand a informa huez cu ta un dia prome cu e caso, e abogado anterior Desiree Croes a retira di ta e abogado y a entrega e documentonan na e abogado nobo. E otro ruman N. Williams a perde su avion na Merca y tampoco por tabata presente. Notable tambe tabata presencia di e chef cu a keda herida. Corte a invit’e tambe pa ta presente, aunke su presencia no tabata obligatorio. E situacion a bira e ora cu tabatin 2 persona cu tabata cla pa cuminsa e tratamento, uno cu tabata den corte sin ta cla pa presenta y e otro na Merca.
ARGUMENTO DI HUEZ
Huez Angela a opta e ora mirando e situacion, cu no ta prudente pa trata e caso, pasobra pa cuminsa, e lo ta un caso unilateral, esta dos sospechoso di e mesun banda, mientras cu e dos otro sospechosonan (rumannan Wiliams) no lo a presenta nan caso. Ademas, e huez a mustra su descontento cu e caso no por sigui pasobra e kier a confronta e sospechosonan cu e imagenan di video di e suseso cu a keda graba y tabata kier a mustra e videonan den corte y pidi nan e momento ey pa nan clarifica e loke cu e huez tabata mira. Pero sin tur presente, esaki lo a bira imposibel. E fiscalnan si tabata kier pa e caso sigui asina mes pero e huez a nenga esey y a insisti pa tur 4 ta presente. Mester bisa cu inicialmente huez tabata dispuesto pa trata e caso cu 3 di e sospechosonan y trata un sospechoso (Williams) despues (esun cu no a keda cla cu abogado na tempo). Pero ora cu e otro ruman (pega na Merca) no tabata localizable via video link (aunke e la priminti su abogado Mohammed cu e lo ta presente via video), a opta e ora pa para e caso y pone un fecha nobo. E huez tabata determina pa trata e caso bek mas liher cu ta posibel, y a busca e fecha mas cerca posibel, cu a resulta di ta dialuna 3 di April proximo. Pa e fecha ey, tur sospechoso a priminti di ta presente. Esun na Hulanda tambe a bay di acuerdo pa ta presente via video, atrobe, mirando cu e ta studiando na Hulanda.
E CASO MES
E caso manera ta conoci, ta trata pues di yiu homber di prome minister di Wever Croes, esta K. Wever, y yiunan di politico Micheal Williams esta N. y C. Williams, y tambe pareha di otro yiu di prome minister esta e sospechoso Y. Torres-Mendez. Oficiallmente segun Ministerio Publico, ‘e sospechosonan ta wordo acusa di maltrato y di a comete violencia den lugar publico 14 november 2021’.
E CASO
E caso aki particular ta data bek dos aña unda cu riba 14 di November 2021, tabatin un pelea den baño di un club nocturno na Palm Beach entre yiunan di e politiconan menciona. E pelea aki no a caba aki pero a sigui despues den un restaurant conoci eybanda mes. Aki e pelea a continua ora cu un di e sospechosonan a topa cu e otro den e restaurant comiendo. Aki tabatin un pelea, cu a inclui destruccion y maltrato entre e personanan y tambe un chef di e restaurant en cuestion. E chef despues a haya tratamento medico y a keda transporta pa hospital.
TRATA E CASO TOCH
Tabatin hopi intento pa e caso no wordo trata publicamente mirando e embergadura di esaki ya cu ta trata di politiconan conoci y yega na un areglo pafo di corte, y despues a purba di trata esaki via un asina yama Tom zitting. Sinembargo noticiacla a compronde cu di parti di un banda di e sospechosonan Williams, a opta pa esaki wordo trata den un caso regular, ya cu nan ta insisti cu nan ta inocente. E caso awor ta riba agenda di Corte, pa tuma lugar otro siman diahuebs pa 8’or y mei di mainta. NOTA: E potret ta di dos sospechoso Williams y Wever y e dos abogadonan Ruiz y Mohammed awe diahuebs mainta bandonando Corte despues cu huez a pospone e caso pa aki dos siman.
Sindicato VWI sorprendi cu declaracion di presidente di Hof riba nan caso di apelacion
ORANJESTAD – Directiva di sindicato Vereniging van Werknemers met een Individuele Arbeidsovereenkomst in dienst van de Water- en Energiebedrijf Aruba (W.E.B.) N.V (VWI) di WEB a keda sorprendi cu declaraciojn di presidente di Hof riba nan caso di apelacion. Manera ta conoci, riba 30 di mei 2023 a sali den diferente medionan di prensa (Diario di 30 di mei 2023 y NoticiaCla di 30 di mei 2023) un declaracion di sr. mr. Mauritsz de Kort, presidente di Corte Comun di Aruba, Corsow y St. Maarten cu a sorprende e bestuur di VWI. “Sr. mr. de Kort ta declara, y nos ta quote: “Ora cu e caso a wordo transpasa di Aruba pa bay pa e combinacion di apelacion, esta e tres hueznan na Corsow, e traspaso no a bay bon, pues nos a perde e caso for di bista”, fin di quote. Cu e “caso”, sr. de Kort ta referi na e caso di apelacion (Hoger Beroep) di VWI vs WEB, esta e caso cu number AUA202100053KG someti na Hof na maart 2021.” Sr. mr. de Kort ta claim cu e “caso no a wordo bon traspasa” y cu door di esaki e “a perde e caso di bista.” Pero VWI na su turno ta puntra su mes ta kico ta pasando na Corte Comun? Aki ta sigui algun feiten:
Afpakteam a detene sospechoso femenino pa malversacion di 2.4 miyon florin
ORANJESTAD - Afpakteam di Aruba a tene un accion awemainta den Caya Frère Johannes, caminda a detene un sospechoso relaciona cu un investigacion di malversacion y estafa. E sospecho ta cu e sospechoso aki a malversa sumanan di placa di mas cu 2,4 miyon florin, cu el a ricibi di clientenan pa entrega na Belastingdienst. Durante e huiszoeking a tuma placa cash, joyas, administracion y computers den beslag. E investigacion no ta cla ainda.
De Kort: Danki na articulo di prensa, Corte a descubri cu a lubida procesa un caso di apelacion
ORANJESTAD – Ta danki na un articulo di prensa cu un caso di apelacion por a wordo trata aña pasa ainda. Asina presidente di Hof, mr Mauritz de Kort a relata dialuna durante e conferencia di prensa pa presenta e relato di aña 2022. Segun de Kort, ta danki na atencion di un trahado di corte cu a tuma nota di un articulo di prensa unda cu sindicato di WEB esta VWI ta reclama tardansa den un caso di apelacion, cu Corte a bin ripara cu enberdad e caso no a keda trata y procesa. Como tal e presidente a pidi pa prensa sigui mantene Corte skerpi.
De Kort: Corte Comun a presenta relato anual 2022: ‘Hende Nobo, Bista nobo!’
ORANJESTAD – Corte Comun di Aruba Aruba, Curaçao, Sint Maarten, Bonaire, Sint Eustatius y Saba a presenta su relato anual di 2022. E tema tabata titula Novus populus cogitationes novas, cu otro palabra, hende nobo, bista nobo. Segun e presidente di Corte Comun mr Mauritz de Kort den hopi aspecto por mira 2022 como un aña di recuperacion, despues di 2 aña di pandemia, cu a frena e operacion di Core obligatoriamente. Asina a tuma un decision pa reasigna cierto departamentonan cu ta sostene corte y su respectivo colaboradornan den nan funcionan nobo. Tambe a para keto na e desaroyonan na algun caso cu tanto den prome instancia como den apelacion den 2022 a tuma lugar. Tambe a pone atencion na e casonan cu a hala atencion riba e.o. Aruba (otro articulo adhunto).
OM y CEA cobrando multanan atrasa y bo por bay cera si no paga!
Corte a anula decision di Gobierno pa kita Richard Kramers como director interno di Guarda Nos Costa
ORANJESTAD – Corte diaranson a anula e decision di gobierno di 2022 pa kita e director interino di Guarda Nos Costa Richard Kramers di su funcion. Asina e sentencia ta dicta, y ta basa riba e hecho cu gobierno a tuma e decision sin base legal, y cu e conseho di Veiligheids Dienst Aruba pa no duna Kramers un certificado of documento di no obhecion (Verklaring van Geen Bezwaar osea un VGB, cu ta necesario pa un funcion asina cu Kramers tabata eherce, cu ta un funcion di confiansa) ta infunda. Gobierno di su banda, ta argumenta cu como cu VDA su conseho ta pa no duna Kramers e certificacion en cuestion, e no por sigui den e funcion ya cu ta trata di un funcion di confiansa. Kramers den e caso (e mes a bringa su caso:red) a argumenta cu e la traha dos aña den e funcion sin cu a dune e documento en cuestion y nada no a pasa. Corte a argumenta awor cu e hecho cu gobierno no kier a duna Kramers e VGB, gobierno a actua di forka illegal. Awor ta keda na gobierno pa dicidi kico ta haci awor cu Kramers, pasobra Corte a anula e decision di gobierno pa Kramers no tin e funcion ey. No ta sigur awor si Kramers lo haya e funcion ey bek, y cu si e por haya e documento di Buena conducta. Lesa e e sentencia di e caso specific aki (tabatin dos sentencia) AKI.
Follow NoticiaCla
