S&P:Aruba ta mantene su cualificacion di BBB, cu panorama stabiel

WASHINGTON – Standard & Poors Ratings (S&P) a re-afirma e cualificacion (credit rating) di pais Aruba na BBB y e panorama stabiel. Esaki ta resultado di un evaluacion teni door di S&P Ratings den luna di januari na unda a papia cu varios actornan den Gobierno y sector priva. 

S&P Ratings ta duna reconocemento na Gobierno di Aruba pa su cumplimento cu normanan fiscal y su compromiso pa implementacion di reformanan structural cu e meta di mehora finansa publico. Otro punto positivo ta e relacion constitucional entre Aruba cu Hulanda, cu S&P Ratings ta considera di ta contribui na stabilidad institutional y politico.

E ratings outlook, cu ta e perspectiva cu S&P Ratings ta hiba pa mehoracion di e rating den futuro inmediato, tambe ta keda stabiel. S&P Ratings ta premira cu Aruba su crecemento economico lo continua den 2023. Esaki a base di e refleho di turismo den nos economia. Apesar cu e economia di Aruba ta depende grandemente di e sector turistico y cu esaki ta vulnerabel pa shock externo y por wordo influencia pa desaroyonan den nos mercado turistico principal, esta Merca, toch S&P Ratings ta premira continuacion di crecemento  economico den 2023.