- Departamento di Progreso Laboral (DPL) cu campaña pa entrega Formulario AMR 2023 den luna di Juni 2023
- Directie Financiën ta informa di e condicionan ora di trata cu cobransa pa instancianan di Gobierno
- Foyeto Abo ta bay studia dentro di poco na Hulanda – con pa registra den BRP
- DUCAPRO a presenta un plan pa promove e industria creativo y proteha e artistanan
- E prome barco di fruta y berdura di Venezuela ta yega Aruba dialuna awor
Dos minister di Aruba lo atende conferencia di awa na Nacionnan Uni e siman aki
ORANJESTAD - Prome Minister Evelyn Wever - Croes a informa cu e siman aki lo atende e conferencia “Un 2023 Water Conference” cu lo tuma luga na New York. Un tema relevante cual Prome Minister lo ta atende conhuntamente cu Minister Ursell Arends di 22 pa 24 di maart, pa trata entre otro desaroyonan di awa mundialmente y nan efecto riba Aruba.
Nivel di awa mundialmente ta aumentando cual ta pone reto grandi pa islanan rond mundo y Aruba no ta excepcion. Prome Minister Wever - Croes, durante di conferencia di gobierno a splica cu ta trahando riba un mapa climatologico di Aruba caminda cu ta indica si nivel di awa subi, cua ta e partinan na Aruba cu ta cuminsa bay bou awa. Esaki ta un problema cu ta exigi compromiso di henter mundo pa soluciona.
Prome Minister Wever - Croes a splica cu tur e islanan cu ta parti di Reino Hulandes ta riba nivel di awa, pero si nivel di awa keda subi, e lo causa problemanan cu consecuencianan severo. Mescos cu awa ta duna bida, awa ta kita bida tambe. Pesey e ta hopi importante pa tuma accion y pa mundo henter tuma accion y mustra e compromiso. Basa ariba esaki, Reino Hulandes ta organisa e conferencia di awa na Nacionnan Uni e siman aki.
Gobierno di Aruba a ricibi e invitacion di Gobierno di Hulanda pa participa na e nivel di mas halto cu ta posibel. Consecuentemente mirando cu ta Rey Willem Alexander ta guia e conferencia aki, a acepta e invitacion y Prome Minister conhuntamente cu Minister Ursell Arends, lo atende e conferencia. Minister Arends tin e cartera di Naturalesa bou su encargo y Prome Minister tin aspectonan infrastructural y adaptacion cu mester tuma luga pa motibo di cambio di clima den su ministerio. Apart di esey, Prome Minister Wever - Croes tin e rol pa reemplasa Rey Willem Alexander cu ta e presidente di e conferencia ora cu e no por ta presente, durante e 3 dianan aki y guia e reunionnan den su nomber. Ademas, tanto Minister Arends y Prome Minister Wever - Croes, lo ta orador na diferente ocasion durante e conferencia.
Prome Minister lo tin un enfoke special riba e posicion di hende muhe, pasobra mundialmente ta comproba cu hende muhe ta esunnan cu ta mas afecta pa cambio climatologico. Esaki ta algo cu kisas no ta ripara mucho di dje na Aruba, y pa motibo cu no kier pa esaki manifesta su mes tampoco, e ta importante pa tuma accion awo.
Prome Minister a indica cu na final, Minister Arends den nomber di Aruba, lo duna cierto compromiso cu Aruba lo percura pe, entre otro pa tin awa limpi y pagabel pa tur hende. Lo compromete pa traha riba plannan di adaptacion pa cambio climatologico, y tambe con ta bay reconfirma compromisonan pa por logra desaroyo sostenibel den cuadro di e Metanan di Desaroyo Sostenibel / Sustainable Development Goals (SDGs) cu a propone.
Finalmente, Premier Wever - Croes a accentua cu e ta importante pa den un escena manera esun di Nacionnan Uni, bati alarma pa tur pais realisa cu esaki ta e momento pa tuma accion, sino paisnan chikito manera Aruba ta haya e cuenta pa paga. Ta mirando esaki caba a traves di daño na medio ambiente cu ta causa cambio climatologico y sushi cu ta laba bin costa procedente di otro pais.
E prome barco di fruta y berdura di Venezuela ta yega Aruba dialuna awor
ORANJESTAD - E prome barco di fruta y berdura di Venezuela a yega Aruba dialuna. Asina prome minister di Aruba Evelyn Wever Croes a confirma diahuebs. E la recorda cu desde 1 di Mei 2023, Gobierno di Aruba a habri e frontera maritimo cu Venezuela y dialuna awor, dia 5 di Juni, e prome barco lo yega Aruba cu 15 ton di fruta, berdura y otro mercancia. Cu esaki ta habri e posibilidad di por importa fruta y berdura y otro mercancianan na prijsnan hopi mas barata for di Venezuela yudando asina pa rebaha costo di bida.
52 ciudadano a completa e curso "Finansas Den Mi Hogar"
ORANJESTAD - nteres tabata grandi pa e di tres edicion di Finansas Den Mi Hogar, e biaha aki na Oranjestad. Despues di 4 sesion cu a enfoca riba con pa maneha bo finansas personal, e di tercer grupo di participante a ricibi nan certificado pa e curso Finansas den mi Hogar. E proyecto Finansas Den Mi Hogar a wordo organisa y financia door di Minister di Economia Minister Geoffrey Wever y desaroya y duna door di Fundacion Plan di Bida.
Aruba ta representa na IPKO e siman aki na Hulanda cu 12 Parlamentario
ORANJESTAD – Aruba ta participa cu un delegacion di no menos cu 13 persona den e proximo reunion Interparlamentario di Reino (IPKO) cu ta cuminsa diahuebs awor na Den Haag Hulanda. Noticiacla a haya confirma cu partido MEP tin 6 miembro, AVP 2, partido MAS, RAIZ y ACCION21 cada uno cu 1 miembro, y e dos parlamentarionan independiente Santos do Nascimento y Croes tambe lo tey. Y e griffier mr Herman Hek. Manera informa, e reunion ta cuminsa diahuebs 1 di juni y ta termina dialuna 5 di juni mientras cu 4 di juni ta bira un dia ‘liber’.
Minister a firma un acuerdo riba tereno di enseñansa entre e 4 paisnan di Reino Hulandes
ORANJESTAD – E siman aki Minister di Enseñansa Endy Croes a reuni cu directora di Departamento di Enseñansa Aruba (DEA), Sra. Anne Marie Proveyer y Coordinerend beleidsmedewerker Caribisch Gebied di Ministerie van Onderwijs, Cultuur en Wetenschap di Hulanda, Sra. Mabel van Houten. E motibo di e encuentro aki ta pa firma e Slotconclusie cu a haci dia 20 di april ultimo entre e cuater (4) Ministernan di Enseñansa di Reino Hulandes, esta Minister di Enseñansa di Aruba Sr. Endy Croes, Minister di Enseñansa di Curaçao Sr. Sithree van Heydoorn, Minister di Enseñansa di Sint Maarten Sr. Rodolphe Samuel y Minister di Enseñansa di Hulanda Sr. Robbert Dijkgraaf. Ta trata di diferente palabracion cu a haci riba nivel di Vierlandenoverleg, entre otro, Studiesucces cu ta trata di un beca pa fomenta intercambio di studiante dentro di Reino Hulandes. Ademas di esaki, a trata e Doorlichting Rapport cu Sra. Proveyer. Di 24 te cu 31 di mei tin un delegacion di Hulanda cu tambe ta reuniendo cu departamentonan di Gobierno y tur esnan cu ta trek e Doorlichting Rapport. Sra. Proveyer a duna Minister Endy Croes informacion di tur palabracion cu a haci durante e reunionnan cu delegacion di Hulanda. Pa finalisa, Minister Endy Croes a expresa cu e tabata un reunion extenso, unda cu a trata temanan na nivel di Vierlandenoverleg. Dentro di algun luna e cuater (4) Ministernan di Enseñansa di Reino Hulandes lo bolbe reuni pa trata temanan di interes comun.
Oduber: E proyecto di digitalisacion di e systema di permiso di horeca ta avansando
ORANJESTAD – Minister di Turismo . Dangui Oduber a informa e siman aki cu e proyecto di digitalisacion cu ta avansando. Segun e mandatario, ya caba pa algun tempo trabounan ta andando den e proyecto di digitalisacion y automatisacion cu lo bay mehora e servicio y eficiencia di e “Horeca vergunning” cu Ministerio di Turismo y Salud Publico ta procesa.
Concepto di ley di BBO na frontera a yega Parlamento ‘porfin’
ORANJESTAD – E ley di BBO na frontera ta premira pa drenta na vigor 1 di juli di e aña aki. Diabierna ultimo e concepto di ley a yega Parlamento y a cuminsa pasa riba dje pa por e.o Parlamentarionan manda pregunta pa Gobierno. Asina minister di finanza Xiomara Maduro a bisa dialuna den un conferencia di prensa riba e tema. Tabata intencion pa pasa e ley prome cu 1 di juni 2023 pero esaki no a logra. BBO ta habri frontera pa introducion di BTW na Aruba segun e mandatario.
Follow NoticiaCla
