- Aruba a ricibi su prome buelo di British Airways diadomingo
- Conocido comediante y artista Eligio Melfor a bay sosega
- Awe nochi ta bo chens di gana 650 mil florin cu Lotto 5
- SETAR ta sponsor di Soul Beach Music Festival 2023
- Ex tesorera di fundacion di partido POR sentencia na 120 ora di trabou comunitario
Dedicacion: Philomena Wong, un baluarte di nos literatura, pa semper den nos curason
ORANJESTAD - Awe nos mester tuma despedida di Philo, cu pena na nos curason.
Un amiga stima, un gran persona, amabel, humoristico y balente cu no tabata acepta inhusticia. Cu su bos y pen skerpi e tabata expresa esey. Ken no ta corda e poema “Placa, placa, placa” cu a capta masha atencion y a causa hopi emocion den pueblo un 20 aña pasa?
Philo tabata masha productivo como poeta: el a publica den e revista “Watapana” y den e antologianan Di Nos (1971) y Cosecha Arubiano (1983). El a publica na aña 1984 e coleccion di poesia ’Mi’ ta biba den mi pensamento, na aña 1986 Na caminda pa independencia y na 1992 Di ta ... pa tabata.
Den su poemanan Philomena ta toca diferente tema importante di bida. Philo tabata militante, e no por a soporta inhusticia y den su poemanan e ta ataca esaki fuertemente: inhusticia contra e mucha (‘Maltrato’), contra e hende muhe (‘Tin orguyo’), contra nos grandinan(‘Anciano’). Philo mes a experencia esaki personalmente durante e ultimo añanan y dianan di su bida: ni oido, ni compresion, ni cariño, ni cuido adecuado no tabatin p’e di parti di esnan responsabel durante e momentonan cu mas el a anhela esey.
Philomena su poemanan ta den un Papiamento rico, profundo y melodioso. Cu su bon dominio di Papiamento Philomena Wong a aporta grandemente na reconocemento di nos idioma Papiamento.
Den e ultimo añanan aki e tabata traha riba un siguiente publicacion cu tur e poemanan cu e tabatin ainda den tapara. Lamentablemente e no a caba cu e trabou aki, pero un grupo di amiga fiel lo cumpli cu e promesa haci y lo percura pa e coleccion aki keda publica.
E siman aki, dia 8 di maart, nos a celebra Dia Internacional di Hende Muhe. Na cuminsamento di decada 80 e gruponan di hende muhe di e tempo ey a organisa pa prome biaha na Aruba un evento masha grandi den e cantina di John F. Kennedy School cu tabata existi ainda. Sala a yena cu mas di 200 hende muhe di tur edad. Tabatin presentacion di teatro foro, musica y canto, baile, declamacion di poesia, pintura, obra di man, un bon cushina.
Un di e declamadornan tabata Philomena cu a impacta cu su poesia cu mensahe fuerte pa esnan presente. Philomena a fayece dia 7 di maart, un dia prome cu Dia Internacional di Hende Muhe. Pero su bos ta keda resona den su poemanan.
Cu e poema “Tin orguyo”, cu ta den e coleccion Di ta ... pa tabata, Philo ta encurasha e hende muhe pa ta orguyoso di su mes y pa ta determina den bida pa logra loke e ta desea.
Philomena, nos ta hopi orguyoso di a conoce bo y ta gradici bo pa loke bo a laga atras pa bo pueblo, pa loke bo a nifica pa cada un di nos. Sosega na paz!
Tin orguyo
Lanta muhe,
lanta!
Lanta fo’i rudia!
Lanta riba pia,
pa bo por para cara cara
cu tur cu ta rondona!
Pa por kibr’e bara
cu tin bo separa
di esnan cu ta para!
Cana muhe,
cana!
Cana bo caminda!
Cana determina,
pa bo por aleha
di tur cu tin bo mara!
Cana banda banda
di tur cu kier cana
pa bo por alcansa
loke bo ta anhela!
Marcha muhe,
marcha!
Marcha cu firmesa!
Marcha cu frankesa
y anima
esnan cu ainda ta na rudia,
pa nan lanta riba pia
cana y marcha
determina,
cu e solo meta
di wordo acepta
como ser igual
di tur cu ta rondona:
muhe emancipa!
Biba muhe,
biba!
Biba cu fervor!
Biba cu balor
y planta respet
pa loke bo ta,
pa loke bo por,
pa loke bo kier,
p’asina tur esnan
cu ta ront di bo
comprende
cu bo ta orguyoso
di ta muhe!
Poema for di: Di ta ... pa tabata, 1992
Soul Beach Music Festival 2023 a añadi mas artista pa e line-up pa Aruba
ORANJESTAD – E organisadornan di Soul Beach Music Festival 2023 a añadi mas artista pa e line-up pa e aña aki. Tabata diaranson atardi durante e conferencia di prensa, e organisador Mark Adkins a anuncia tres nomber extra cu lo presenta durante e fin di siman di e festival. Ta trata di e.o. e cantante Anthony Hamilton cu a wordo añadi pa e diasabra anochi, mientras cu a añadi comediantenan Dean Cole cu Tiffany Haddish pa e anochi di comedia, riba e diabierna. E otronan manera The Roots, Jill Scott y Lucky Daye a keda anuncia caba durante un raporta anterior di primicia di Noticiacla algun tempo atras.
General Manager Vasco v. Baseli ta despedi di Hilton Aruba
PALM BEACH – Siman pasa, Miembronan di team na Hilton Aruba a bisa te aworo na nan General Manager, un estimado lider, Vasco v. Baselli, despues di tres anja y mey. Cu mas di tres decada di conocemento y experiencia, Baselli a cuminsa su mision na e resort den Mei 2019. Awor, e ta bay over na sigui cu un rol corporativo cu Hilton manera Vice Presidente di Operations pa e region di Sur America.
Stanley Clementina den colaboracion cu e cantante Jahari ta lansa un cancion nobo titula ‘Nos Historia’
ORANJESTAD - Despues di a estrena su cancion ritmo kompa titula ‘Masha Ten’, den luna di Januari un cancion cu ta un cover di e banda ‘Bon Bon’ presenta pa e banda Haitiano ‘Enposib’ e artista Stanley Clementina naci na nos hermana Isla Corsou, residencia na Hulanda, ta lansa un otro cancion en colaboracion cu e cantante Jahari di Corsou, titula ‘Nos Historia’.
Premio Meneer Ovito Tromp 2023 a keda otorga na sra. Margarita Roza-Christiaans
ORANJESTAD - E aña aki pa di 5 biaha, Centro di Bario Noord a celebra nos dia nacional, Dia di Himno y Bandera, cu nos actividad Fiesta Arubiano cu cada biaha ta un exito rotundo. Riba e dia aki nos a entrega tambe Premio meneer Ovito Tromp.
Fundacion Aruba One Happy Island Lions Club ta inicia campaña pa recauda fondo
ORANJESTAD - Fundacion Aruba One Happy Island Lions Club ta e organisacion encarga cu 2 club di servicio na Aruba cu ta One Happy Island Lions Club y e club di hobenan adulto Delta Aruba Leo Club.
Biblioteca Nacional Aruba ta join e celebracion di Dia di Himno y bandera
ORANJESTAD - Biblioteca Nacional Aruba ta join e celebracion di Dia di Himno y bandera diasabra dia 18 di maart. Nan ta invita comunidad pa pasa un rato cu hunto. Portanan ta hancho habri diasabra cu un programa musical, weganan popular, cuminda crioyo y cos dushi y un Mercado di Buki segunda mano. E programa ta di 9or di mainta te 2or y mey di merdia.
Follow NoticiaCla
