Aruba tin su propio viñedo, bodega y distileria Alto Vista Winery, produciendo biña y rum localmente

ORANJESTAD – Aruba tin un otro biña propio produci, di su propio bodega, Alto Vista Winery. Fuera di biña, e bodega ta produci su mesun rum tambe di druif y caña di sucu planta y cosecha na Aruba. E nomber so caba ta hopi pegagoso y ta dune un tinte mas local, esta usando Alto Vista y e imagen di e capiya como ilustracion riba e label di e biñanan. E rum -Red Star na honor di e strea cora di e bandera di Aruba- ta uno estilo ‘Rhum Agricole’ di e islanan frances Guadeloupe y Martinique traha di e juice fresco di caña, dus no di melasa manera rumnan commercial. Propietarionan ta local, conocido entrepreneur y abogado di profesion David Kock, su senora Paola y su tres yiunan. Den tur silencio y 6 aña largo nan a sa di crea e productonan aki, cu awor a bira conoci. Asina e Inversionista local a trece un concepto nobo den mercado.

RETO

Segun Kock ,-cu hunto cu su yiunan ta produci nan mesun koffie (Kompananzi) na e clima seco estilo desierto-, agricultura local ta trece hopi reto cu ne. Pero cu esfuerso creativo, Alto Vista a logra surpasa esaki y produci biña y rum comercialmente, y a bira e prome y unico bodega boutique. “E ambiente particular local y circumstancia ta crea algo special cu ta refleha den e sabornan y y aroma unico di e biñanan, tur haci na man, na manera artisanal dedica na calidad. Ta produci 5 tipo di biña, entre nan esun cora esta e Tempranillo & Syrah y blanco esta e Chenin Blanc y French Colombard, tambe un biña blanco cu a pasa un tempo den bari.  E concepto di e compania, yama agritourism, unda cu e bishitante ta tour e viñedo (vineyard) , disteleria y bodega pa despues goza di un tasting di tur e productonan den un area ameno disfrutando di e bista unico. Keda pendiente pronto pa un relato mas amplio, unda cu lo tin mas informacion di e producto local interesante aki