Na Corsou, dokternan di cas kier mira pa nan kere pa nan problemanan

WILLEMSTAD - Dòkternan di kas ke tin sierto garantia si ku awor si nan asuntunan ku ta pendiente lo ser solushoná. Esei pa motibu ku nan a sinta hopi biaha na mesa ku diferente minister di salubridat sin nada a bin afó te awe. Pues e hasimentu di promesa i keda sin kumpli ta algu ku nan konosé kaba. Awor si nan ta spera ku lo kumpli ku promesanan hasí. Esei ta loke  por a dedusí for di un reakshon di dr. Jerry Semper, presidente dje Asosiashon di Dòkternan di Kas (CHV) despues di un reunion ku nan a tene bou di oranan di trabou ayera mainta. E reunion aki alabes tabatin karakter di un protesta kontra inkumplimentunan di parti di gobièrnu.

Segun dr. Semper, nan a sinti e bon boluntat i bon intenshon di parti di Minister di Salubridat a.i. sr. Javier Silvania pa solushoná e problemanan ku tin diesdos aña ta warda. Tin di bini ku un mihó forma di kuido na momentu ku habri un pòst di dòkternan di kas. Durante e diesdos añanan aki a kere den e bon boluntat di tur minister, sinembargo no tabatin kumplimentu.

Dòkternan di kas a skohe pa sigui traha bou dje kondishonnan ku tin te awor, sin kobra, pero esei pasobra nan tin salú dje pueblo aki na pechu. Meskos ta konta pa e ministernan Gilmar Pisas i Javier Silvania kendenan a akudí na e reunion di ayera. A palabrá ku denter di un siman lo bai mesa pa atendé algun asuntu pa asina e problemanan por ta kompletá denter di kuater siman manera minister Silvania a pidi. Pero si despues di kuater siman no a yega na un konklushon, dòkternan di kas lo no duna e garantia ku nan lo ofresé un kuido manera ta e kaso aktualmente.

E kuater simannan ta ekspirá dia 4 di aprel 2023, i dado kaso no a yega na un solushon satisfaktorio lo informá tur e instansianan relevante. I den kaso ku tin di atendé ku pashèntnan despues di oranan di ofisina, esakinan lo tin di bati na porta di CMC. Pues for di awor tur hende ta atvertí, pasobra dòkternan ta kargando un responsabilidat di gobièrnu. A hasi e promesanan, pero teniendo kuenta ku e eksperensianan di pasado, dòkternan tin di mira pa nan kere!

No ta responsabel ku un dòkter tin di traha praktikamente 72 ora sin drumi, inkluyendo oranan di warda i sin pago. Segun dr. Semper, e mihó kuido ta ser duna na momentu ku un dòkter ta bon sosegá i por traha den un struktura na drechi. P’esei nan ta spera ku lo bini ku e “Huisartsen Post” ei pa kaba. NOTA: E texto ta scirbi den Papiamento fonetico di Corsou.