Despues di a nenga di mara na Bonaire y Aruba, barco crucero a mara na Corsou

ORANJESTAD  – Despues cu e barco crucero Enchanted Princess a nenga di mara na Bonaire y Aruba, e la dicidi di bay Corsou y ey si el a mara. Pues Corsou a haya un bishita inespera dialuna di e barco aki. Aruba y Bonaire no tabata posibel segun e capitan debi na biento fuerte. 

KICO A PASA

Manera cu Noticiacla a raporta den forma di primicia dialuna, debi na biento fuerte dialuna, e barco crucero Enchanted Princess no a mara na Aruba y a cancela su bishita. Un dia prome tambe e bishita na Bonaire a keda cancela pa mesun motibo. Di otro banda un otro bapor crucero, Norwegian Jewel si a mara normal y ta poni pa bandona Aruba 8pm awe nochi. No ta conoci ainda pakico un si a mara y e otro no, pero ta decision di capitan. 

BONAIRE

Tabata diadomingo cu na Bonaire e capitan di Enchanted tambe a opta pa no mara (biento di 30 nudo y mas). E la haci e intento si pero tabatin problema pa haci esey. A argumenta tambe cu pa keda mara durante ocho ora cu biento fuerte, lo a frma un riesgo halto pa e barco y e pasaheronan. A base di consideracionan di seguridad, finalmente e capitan a dicidi pa no mara mas y cancela e bishita. Director di Aruba Ports Authority Mark Figaroa a confirma e situacion pero a bisa mesora tambe cu ta discrecion di e capitan di e barco, kico ta sosode y ta e tin e decision final. Cu esaki, e pasaheronan crucero a perde dos parada, esta Bonaire y Aruba, pa motibo di biento duro. Noticiacla a compronde cu empleadonan di e haf a ofrece e capitan diferente opcion y guia pa mara na Waf Nelo Craane (waf suid). Pero e capitan a haya e opcionan ey much risca.