Na Corsou Minister Silvania a bira minister di salud interino caba, reemplazando Pietersz

WILLEMSTAD - Minister di finansa sr. Javier Silvania ya a tuma su ròl di Minister interino di Salubridat, despues ku djadumingu último partido (MFK) a pidi e minister dr. Dorothy Pietersz-Janga pa e pone su funshon na disposishon dje partido. Esaki nos ta konkluí despues di dos mensahe ku ayera minister Silvania a publiká. Un di nan ta ku pa awe mainta su persona i tambe promé minister sr. Gilmar Pisas lo tin un reunion ku e Asosashon di Dòkternan di Kas ku ta den akshon awe mainta.

E di dos informe ta ku djabièrnè Minister Silvania a bisa di ta bishitá CMC pa pone su mes na altura di e situashon di e hospital. Segun e lista di remplaso interino pa ministernan ku gobièrnu a emití den yüni 2021 ta indiká ku ora sra. Pietersz-Janga no tei, ta minister Silvania lo ta su remplasante interino. Pues mesora minister Silvania a tuma su ròl di remplasante interino di ministerio di GMN.

Manera ariba indiká Movementu Futuro Kòrsou a bisa ku den un kombersashon ku a tuma lugá djadumingu 5 di mart ku Minister di GMN, Dr. Dorothy Pietersz-Janga, MFK, a pidi e Minister pa e pone su funshon na disposishon di MFK. Esaki relashoná ku e último sentensia di korte den e kaso di BZV. Den e kaso aki, e minister Pietersz-Janga a manda karta pa para un kaso kaminda dos persona di gerensia den e fundashon a hiba mal maneho i nan mester paga 4 mion florin. Si a para e kaso aki, pueblo di Kòrsou lo a keda pèrdí di 4 mion florin.

MFK a informá Minister Pietersz-Janga ku e no por konta mas ku sosten di MFK komo Minister di GMN.

Minister Pietersz-Janga a pidi MFK tres dia pa e duna MFK un kontesta, relashoná ku e petishon di MFK pa e pone su funshon na disposishon di partido. Ya kaba minister Silvania a tuma su ròl. NOTA: E articulo ta scirbi den Papiamento fonetico di Corsou.