Na Corsou, minister di finanza ta cuestiona calidad di gasoline

WILLEMSTAD - Ainda Minister di Finansa, sr. Javier Silvania, ta warda riba resultado di e investigashon riba kalidat di gasolin ku su kolega Minister di Ekonomia sr. Ruisandro Cijntje a primintí. Asina e mandatario ta bisa den un karta ekstenso ku el a dirigí na su kolega. Den su karta sr. Silvania ta bisa ku, te ainda e por kòrda kon durante añanan 2021 i 2022 e komunidat di Kòrsou a bin ta ser hopi krítiko riba e kalidat dje gasolin aktual kual ta ser importá dor di Curoil.

Pero komo reakshon riba e krítikanan ei sr. Cijntje a duna komo reakshon e tempu ei ku e lo laga hasi un investigashon riba kalidat di gasolin dor di un terser partido independiente. E investigashon ku lo mester a ser hasí for di e tempu ei lo mester ta dirigí riba e kalidat di kombustibel, inklusive presentashon di posibel solushonnan dado kaso e kalidat dje kombustibel no ta kumpli ku e kondishonnan moderno. Pa e ministerio aki di MEO, komo esun ku ta stipulá maneho, e resultadonan di un investigashon asina ta masha relevante.

Mas aleu e mandatario ta bisa ku, e usuarionan dje kombustibel aki tambe ta en espera di e resultado dje investigashon pa asina por tin klaridat si e kalidat dje kombustibel lo por tin influensia riba prestashon di nan vehíkulonan.

Mas aleu e ta bisa ku, durante un kòmbersashon riba mitigashon di preisnan di kombustibel na 2022, Minister Cijntje a duna di konosé tambe ku e investigashon en kuestion riba kalidat di kombustibel lo ta kla pa fin di luna di mart òf meimei di aprel 2023. Pero dado kaso e investigashon ei a finalisá, sr. Silvania ta pidi pa kompartí e resultado kuné. E no sa di e fecha di konklushon a ser adaptá òf no, pero konsiderando importansia dje tópiko aki, tòg e lo ke kompartí algun punto ku su kolega. NOTA: E articulo ta scirbi den Papiamento fonetico di Corsou.