SOGA: Contratista a para proyecto di construccion y renobacion di Hospital

ORANJESTAD – Despues di varios dias di speculacion, diabierna atardi, e fundacion encarga cu e proyecto di renobacion y expansion di hospital Horacio Oduber, esta Stichting Ontroerend Goed Aruba (SOGA), a confirma cu enberdad tin un desacuerdo entre SOGA y e General Contractor OHLA, di e proyecto di Expansion y Renobacion di Dr. Horacio Oduber Hospital. Segun SOGA, a base di e desacuerdo riba extension di e terminación di proyecto e contratista a tuma e decision pa no sigui cu e proyecto di construccion. SOGA a sigura cu ta tumando tur e pasonan necesario pa sigura cumplimento cu e condicionan di e contrato y su derechonan.

PASADO 

SOGA a sigura tambe cu na tur previo ocasion, cu a surgi un diferencia di opinion, SOGA y OHLA semper a sa di yega na solucion, basa riba stipulacionnan den e contrato di construccion. Basa riba un interpretacion di e contrato, cu ta diferencia di e interpretacion di SOGA, OHLA a conclui cu e por bandona e trabou, mandando e subcontratistanan local cas. Esaki apesar di tur esfuerzo di banda di SOGA, Hospital y Gobierno di Aruba, pa evita esaki.

ACUERDO NECESARIO

Siguientemente, SOGA lo trata pa yega na e acuerdonan necesario pa asina trabou por wordo reanuda lo mas pronto cu ta posibel pa termina e proyecto. Segun SOGA, den e cuadro aki ta importante pa menciona cu gran mayoria di e trabou a wordo ehecuta door di contratistanan local como subcontratista di General Contractor, cu sigur lo kier keda contribui, pa duna nos comunidad e hospital cu e merece. “E contratistanan local aki ta completamente capacita pa termina e proyecto pa locual cu falta” e comunicado di SOGA ta sigui bisa.

LO TERMINA E TRABOU

SOGA a sigura cu ta consiente di e importancia pa e trabou di expansion y renobacion di hospital, pa cual falta awor menos cu 10%, wordo finalisa mas pronto cu ta posibel. “SOGA su meta y compromiso ta pa e proyecto wordo completa full y na un bon manera, pa asina nos unico hospital na Aruba por sigi duna e servicio mereci, na comunidad di Aruba y na e turistanan cu ta bishita nos isla” e comunicado a finalisa bisando.

TRAHADONAN DI HOSPITAL

Mientrastanto hospital internamente diabierna a manda un memo pa su trahadonan pa splica nan e situacion actual cu a surgi entre e contratista y SOGA, unda cu a informa nan tambe cu e hunta ta pendiente pa sinta cu ministernan y SOGA pa asina atende cu e atencion actual. A priminti e trahadonan di lo mantene nan tur informa di e loke ta y lo sigui pasa.