ATA via un campaña ta invita biaheronan Mericano pa bira ‘un meteorologo temporal’ na Aruba

ORANJESTAD – Oficina di turismo di Aruba ta invitando biaheronan potencial di Merca pa bira ‘ E meteorologo di Aruba pa un tempo limita’. E ta un campaña cu ta incentiva biaheronan potencial di Merca pa aplica pa ‘E trabou mas facil di mundo’, cu ta “un meteorologo pa un tempo limita’. E intencion ta pa asina propaganda e tempo casi perfecto cu tin na Aruba henter aña, mira di punto di bista di un biahero Mericano. Y manera ta bisa semper, e miho propaganda ta bin di e persona cu experienca esaki su mes. 

E CAMPAÑA

Te cu fin di maart di e aña aki, esnan cu ta buscando un destinacion yen di solo, lo por participa pa gana un biahe di 6 anochi y 7 dia pa Aruba pa dos persona, unda cu nan por haci ‘raportahe di tempo di Aruba’ pa e canalnan di media social di Aruba. Participantenan lo wordo puntra pa bishita  Aruba.com/WorldsEasiestJob pa registra y manda nan video di 30 seconde di nan mes, raportando riba e tempo for di nan cas na Merca. 

E IDEA

E pensamento ta cu hopi biaha biaheronan ta haya nan mes ta cambia nan vacacion planea cu hopi anticipacion  den ultimo momento debi na condicionan di tempo. Pero,- y esaki ta e pensamento-, Aruba ta bendiciona di tin un shelo cla y cu solo continuo, haciendo esaki un destinacion perfecto pa explora y bishita henter aña. Asina e CEO di ATA Ronella Croes ta duna como splicacion.  " Door di e campaña di ‘E trabou mas facil na mundo’, nos kier encontra e persona perfecto pa raporta tempo, y yuda nos profila e tempo perfecto di e isla” Croes ta sigui bisa. E participante cu keda selecta, ta bira e meteorologo pa un siman y ta keda na e hotel mas nobo di Aruba  Embassy Suites by Hilton Aruba Resort.