Famia di mucha Mericano cu a muri den accidente acuatico, lo no demanda Aruba

CAMBRIDGE – Un aña despues cu nan yiu a muri durante un accidente fatal cu tubing (watersport) na Aruba, Dave y Linda Murray a splica publicamente cu nan a dicidi cu nan no ta demanda Aruba pa esaki. No pasobra nan no kier sino pasobra segun nan informacion ricibi, e leynan na Aruba (contrario na esun di Merca) ta diferente y no tin sentido. Ademas, segun nan informacion, Ministerio Publico lo a informa nan di no persigui e compania ya cu no tabatin actonan criminal den e morto di e mucha muher Cassidy. Ministerio Publico den un reaccion cortico na noticiacla.com mientrastanto a confirma e contesta aki tambe. E vocero di OM Ann Angela a bisa specificamente cu " ‘Ministerio Publico no tabata envolvi den handling di e accidente, mirando cu for di investigacion policial no a resulta hecho castigable’.’E caso a bolbe haya atencion nacional e siman aki ora cu e famia a keda entrevisat den e programa popular di e canal ABC, esta Good Morning America. Mester bisa cu e entrevisa aki a haya hopi cobertura mes na Merca y otro paisnan, y por a conta cu por lo menos 13 canal y instancia a reproduci e entrevista aki y informacion.

PROME MINISTER Y ATA

E famia ta purbando via otro caminda, pa haya un tipo di trankilidad y cera e episodio aki, door di papia cu prome minister di Aruba directamente y e oficina di turismo local esta ATA. Esaki den un intento pa trece concientisacion pa otro personanan no tin cu pasa den un mesun situacion cu nan a pasa. Nan ta spera cu cualkier Mericano cu kier disfruta na Aruba, prome cu nan tuma e decision di subi laman, nan pensa riba e entrevista y consehonan di e famia aki, pa asina ta mas conciente y alerta pa cu e actonan actuatico. 

E CASO

Tabata aña pasa riba un diaranson na maart (23 di maart 2022) cu e yiu muher di 13 aña a muri ora cu un boto di watersport local a pasa riba dje cu consecuencia fatal. E cu su tata tabata riba un di e tubonan actuatico cu boto ta ranca. Dado momento e mucha a cay den laman, y ora cu e boto a bolbe, e la pasa riba e mucha cu e consecuencia conoci. E tata Dave a conta con tur cos a sosode, durante e entrevista e siman aki na television Mericano.   E tabata un morto hopi cruel unda cu ni dos docter Mericano cu tabata eynan di vacacion riba beach, por a haci algo pa scapa su bida. E loke a keda di e mucha muher tabata cruel y como tal no a logra scapa.  E famia ta haciendo tur cos den un forma mas positivo posibel pa evita cu otronan pasa den mesun tragedia.

ALERTA CONTRA ARUBA

E famia ta conta tambe cu mientras cu no tin ningun alerta di biahe contra Aruba di e departamento di estado, ta bisa si cu “e industria di turismo (na Aruba) no ta bon regula y cu inspeccion di seguridad pa ekipo y facilidad no ta algo comun. Cu areanan di peliger no semper ta avisa cu e borchinan corecto y e staf no ta entrena of certifica pa e compania of gobierno of autoridad reconoci riba e tereno en cuestion”. Por wak e entrevista di Good Morning American AKI. Potret cortesia ABC News.