Frontera maritimo cu Venezuela por habri 1 di mei si Venezuela cumpli cu condicionnan

ORANJESTAD - Un siman despues cu Corsou a anuncia cu e ta cla pa habri frontera aereo y maritimo cu Venezuela,y cu Venezuela a aproba esaki, Aruba su gobierno a kibra e silencio riba e tema aki. Diahuebs gobierno di Aruba a anucia cu frontera maritimo cu Venezuela por habri 1 di mei si Venezuela cumpli cu condicionnan. Cu esaki, e ta confirma e informacion cu fuentenan di noticiacla a indica siman pasa ora cu nos a haci mencion caba cu e ta mustra cu pa mei proximo (2023) esaki por sosode.  Contrario na Corsou, no ta boga ainda pa esun aereo si.  A recorda cu dia 31 januari 2023 a tuma luga e di tres reunion tecnico pa cu reapertura di frontera entre e paisnan den Reino y Venezuela desde cu a cera frontera na 2019. 

HABRI FRONTERA DEN FASE

Segun e comunicado, Aruba kier traha riba re apertura di frontera den fase. E prome fase, lo ta e frontera maritimo. Pa por importa productonan mas barata di Venezuela, fruta, berdura, comestible, material di construccion. Esey lo yuda nos baha costo di bida. Trabounan pa logra esaki ta hopi avansa. Pa loke ta e fecha, Aruba a indica cu 1 di mei nos por habri frontera maritimo, contal cu nos haya e documentacion necesario di Venezuela no mas tarda cu 31 di maart. Si prome cu e fecha ey Venezuela cumpli, nos por habri frontera dia 1 di mei.

DOS FAS

E di dos fase, ta apertura di frontera aereo, pero pa esaki no tin fecha ainda. Aki si tin hopi trabou pa haci ainda, y nos departamentonan den e area di husticia, inmigracion y aviacion civil ta trahando riba esaki. “Aruba por habri frontera ora nos ta cla p’e. Gobierno di Aruba ta keda pendiente di Venezuela pa cumpli cu e condicionnan.”