Gobierno a kibra silencio: Ta rechasa comportacion di algun turista homosexual riba barco siman pasa

ORANJESTAD – Un siman despues cu un grupo grandi di homosexual a yega Aruba, y cu algun di nan a comporta nan mes di un forma cu a causa consternacion, gobierno di Aruba a reacciona. Cu esaki nan a kibra silencio riba e tema aki despues di no a bisa nada nada prome. Hopi tabata cuestiona con bin gobierno no a sali afo ainda riba e tema, y mustra un of otro tipo di reaccion. Hasta propio miembronan di partido di e gobierno na mando esta MEP a cuestiona esaki publicamente. Otro instancianan tambe manera e grupo di religioso cu a protesta siman pasa riba e tema aki tamb. Pero, tabata awe mainta cu gobierno a reaciona publicamente, condenando e comportacion di algun di e grupo. “Siman pasa diaranson, algun turista cu a bin cu Royal Caribbean cruises, a demostra comportacionnan totalmente inaceptable di nudismo y sexo den publico. Esakinan ta actonan castigable, cu nos no ta tolera na Aruba, ni di localnan y tampoco di turistanan” e reaccion di gobierno a bisa awe mainta. 

CARTA PA CRUSERO

Gobierno a informa tambe cu mientrastanto nan a manda carta pa e crucero pa expresa e desacuerdo di Gobierno di Aruba pa cu e comportacion inaceptable di e bishitantenan en cuestion. Tambe a avisa e establesimentonan caminda e comportacionnan aki a manifesta nan mes, cu tipo di actonan sexual cu ta graba riba video, no ta aceptable y cu nan por perde nan permiso di operacion.

NO TA GENERALISA

Segun gobierno, ta importante si pa no generalisa. “ Gobierno di Aruba ta lamenta e consternacion cu e turistanan aki a causa riba nos pais, y ta determina pa percura pa esaki no ripiti. Na Aruba nos conoce normanan cu nos ta tene nos ciudadanonan na dje, y na cual nos turistanan tambe mester atene nan mes na dje” e comunicado a finalisa bisando.