Banco Central di Aruba a hisa e tasa di reserva obligatorio cu mitar porciento

ORANJESTAD - Conforme e tarea di e Comite di Maneho Monetario (CMM) pa evalua, dirigi y duna transparencia riba e accionnan di maneho monetario di Banco Central di Aruba (BCA), BCA ta informa lo siguiente. Durante e reunion di 16 di december 2022, CMM a dicidi pa hisa e tasa di reserva obligatorio cu 0,5 punto di porcentahe pa 25,5 porciento entrante 1 di januari 2023. Di e manera aki, e banconan comercial mester tene un balansa minimo na BCA cu ta igual na 25,5 porciento di e depositonan riba termino cortico di nan clientenan. E decision pa subi e tasa di reserva obligatorio cu 0,5 punto di porcentahe ta basa primordialmente riba e nivel amplio di likides excesivo na e banconan comercial cu ta persisti ariba nivel pre-pandemico,  y e bahada den rapidez cu e nivel di likides excesivo ta disminuyendo cu datonan preliminario di november 2022 atrobe registrando un subida. E subida di 0,5 punto di porcentahe den reserva obligatorio tin como meta pa sigura un bahada gradual di likides excesivo na e banconan comercial, pero CBA ta determina pa, basa riba desaroyo den nivel di likides den lunanan cu ta bin, pa un bes mas hisa e incremento , si ta considera esaki necesario. 

E CMM a considera e siguiente informacion y analisis den su deliberacion:

RESERVANAN INTERNACIONAL Y OFICIAL 

E reservanan internacional, cu ta consisti di reservanan oficial di BCA y reservanan di divisa na e banconan comercial a subi cu Afl. 68,4 miyon (Grafico 1) te cu 18 di november 2022, compara cu fin di december 2021. E reservanan oficial a baha cu Afl. 1,3 miyon, mientras cu e reservanan teni pa banconan comercial a subi cu Afl. 69,7 miyon. Consecuentemente, te cu 18 di november 2022, e reservanan oficial y internacional a suma Afl. 2.743,6 miyon y Afl. 3.198,0 miyon, respectivamente. 

Sostene un nivel adecua di reservanan ta critico pa mantene e tasa di cambio fiho entre e florin Arubano y e dollar Mericano. Teniendo cuenta cu esaki, BCA ta anticipa cu e reservanan internacional lo keda ampliamente riba e rekisito di tres luna di pago riba e cuenta coriente di e balansa di pago. E pagonan riba e cuenta coriente di e balansa di pago ta consisti, entre otro, di pagonan pa importacion, pagonan di interes na inversionistanan stranhero y transferencianan pa exterior manera placa manda afo door di trahadonan stranhero. Ta proyecta cu e reservanan oficial lo keda dentro di e margen aceptabel basa riba e metrico ‘Assessing Reserve Adequacy’ (ARA) di e Fondo Monetario Internacional (FMI) (Tabel 1). 

INFLACION

Na october 2022, e Indice di Prijs di Consumo (IPC) a subi cu 7,0 porciento compara cu e mesun luna di e aña anterior (Grafico 2), igual na final di september 2022. E aumento aki tabata causa door di e crecemento den prijs di utilidad, cu a afecta e componente di ‘vivienda’ (contribuyendo cu 2,9 punto di porcentahe). Tambe e prijs di gasoline a aumenta, cu na su turno ta impacta e componente di ‘transporte’ (contribuyendo cu 1,6 punto di porcentahe) y e componente ‘cuminda y bebida no alcoholico’ (contribuyendo cu 1,4 punto di porcentahe).

E inflacion midi riba promedio di 12 luna a subi di 4.3 porciento te na 5,1 porciento. BCA ta estima cu e preshon inflacionario eleva lo persisti durante e resto di 2022, debi na e nivel eleva di prijs di petroleo riba mercadonan internacional y e ahustenan recien den prijs di awa y coriente. Ademas, BCA ta premira cu Aruba lo importa un gran parti di e aumentonan den prijs for di su partnernan di exportacion, particularmente Estados Unidos y Europa. 

Na october 2022, inflacion basico (excluyendo cuminda y energia) a accelera for di 2.4 porciento pa 2,7 porciento si midi e final di respectivo luna contra e mes un luna di e aña anterior. Basa riba un promedio anual, inflacion basico a yega na 2,1 porciento, un siboda for di 1.9 porciento na fin di october 2022.

LIKIDES EXCESIVO NA  BANCONAN COMERCIAL

E total di likides excesivo na e banconan comercial a baha di Afl. 1.320,5 miyon na december 2021 te na Afl. 778,3 miyon na oktober 2022 (Grafico 3). E caida den likides excesivo ta debi principalmente na e subidanan consecutivo den e tasa di reserva obligatorio durante e periodo di januari 2022 te cu juli 2022. Na october 2022 likides excesivo a sigui baha, sinembargo menos liher. Es mas, datos semanal pa november 2022 ta registra un aumento den likides excesivo. Ademas, e nivel di likides excesivo a keda mas halto cu e nivelnan prome cu e pandemia na februari 2020 (+Afl. 89,2 miyon). E nivel halto di likides excesivo tabata causa pa e nivel abou di demanda pa credito, e recuperacion den e sector di turismo y e  aumento adicional den deposito.