Partido MEP ta lamenta cu ex-candidato ta involucra den investigacion cu husticia

ORANJESTAD – Partido MEP e siman aki a reacciona riba e caso di siman pasa ora cu landsrecherche a tene un entrada hudicial na cas di ex minister pa e partido, esta Chris Romero. E partido ta splica cu ‘ recientemente a tuma nota di un investigacion contra ex colega di partido segun informe cu OM a divulga. “Partido MEP ta lamenta cu un ex-candidato ta haye involucra den un investigacion cu husticia sinembargo tin tur confiansa den Husticia na Aruba”, e partido ta cuminsa na bisa.

SR. ROMERO NO TA CANDIDATO MAS DESDE MEI 2021

E partido a entafisa cu e ex minister (Sr. Romero) no a participa na ultimo eleccion y no ta candidato di partido MEP desde mei 2021. Segun e partido, mester laga husticia cana su caminda y na final di e investigacion, esnan responsabel mester wordo responsabilisa. Partido MEP a sigui sigura cu nan ta para pa integridad, y a demostra esaki a traves di varios ley y maneho implementa durante Gabinete Wever-Croes 1 y 2. 

PARTIDO MEP NO TA BRASA NI DEFENDE CORUPCION

“Nos Lider Evelyn Wever-Croes semper a vocifera cu esnan cu haci cualkier cos cu no ta integro, mester carga nan responsabilidad pa esaki” e partido a sigui bisa. “Partido MEP no ta brasa ni defende corupcion di ningun hende, sin importa laso familiar, amistoso of politico”. Segun e partido, esaki a keda demostra tambe tempo cu un miembro a comete iregularidad financiero den Partido durante su funcion como tesorero di partido. “MEP no ta pone man riba cabes di politico corupto manera Partido AVP ta haci y laga nan den poder of keda sostene nan”.