- AZV: Contracto cu dentista Mayra Rosales ta termina
- Pastoral Hubenil Aruba cu Caminda di Luz Hubenil na misa di Dakota
- Gobierno Hulandes a anuncia pasonan conkreto despues di disculpa pasado di sclabitud
- Fin di siman aki gobierno nobo di St Maarten ta huramenta porfin
- Exposicion ‘The trip of my life’ na Bibioteca Nacional di Aruba
CAft: “Haci uzo di recuperacion na probecho di un economia resistente”
ORANJESTAD – Recuperacion di economia Arubiano ta sigui. Den 2022 economia a crece cu 12 porciento, segun e ultimo calculonan di Fondo Monetario Internacional (IMF). Pa 2023 ta spera un crecemento di 5 porciento. Door di, entre otro, e recuperacion economico fuerte aki y e medidanan fiscal anuncia, ta spera un surplus presupuestario di 1 porciento di e producto interno bruto (PIB) na 2023. Esaki ta un cambio positivo, considerando e impacto di e crisis di pandemia durante e ultimo añanan. Importante ta pa Aruba probecha di e impulso aki pa reduci e debe publico di AWG 5.700 miyon na un nivel sostenibel. Pa logra esey Aruba mester spaar extra banda di aumenta entrada y cobertura incidental. Reforma structural di cuido di salud y seguridad social ta percura pa mas resiliencia. CAft a pidi atencion pa esaki durante su bishita na Aruba dia 9 y 10 di februari 2023.
TRAHA PA YEGA NA ECONOMIA RESILIENTE
Aunke economia di Aruba ta recuperando fuertemente y ta spera un surplus di 1 porciento di e PIB na 2023, preocupacion pa futuro ta sigui vigente. Debe pa cada residente di Aruba ta mas o menos AWG 55.000. E generacionnan futuro ta horca cu debe halto. P’esey, ta importante pa Aruba tuma paso pa logra finansa publico sostenibel. Presupuesto di 2023 ta cumpli cu e norma presupuestario y esey ta un prome paso den bon direccion. Pero, pa mantene e tendencia aki y logra surplus mas halto den e añanan binidero, mester medida adicional. Importante ta pa Aruba spaar stucturalmente mas, na 2023 caba, y no warda te na 2024 pa haci esey, manera ta propone den e presupuesto. E Pakete di Medida (Landspakket) ta sirbi como guia pa esaki, manera aumento di habilidad di entidad gubernamental, manera Serlimar y Arubus N.V., pa mantene nan mes financieramente.
IMPUESTO
Entrada fiscal di Aruba por subi significativamente, si mehora cumplimento fiscal. CAft ta recomenda pa tuma medida diligentemente al respecto. No solamente ta contribui na mehoracion di finansa publico, sino tambe na distribucion mas balansa di presion fiscal. Den e contexto ey CAft ta recomenda pa reconsidera introduccion di impuesto riba tip. Den liña cu e obhetivonan di e Pakete di Medida, Aruba ta trahando pa simplifica e sistema fiscal. Pa logra un surplus di por lo menos 1 porciento di e PIB den 2023, mester cuminsa e proceso legislativo pa cobra impuesto riba volumen di benta (BBO) na frontera mas pronto posibel. Tambe, den liña cu recomendacion anterior di IMF, CAft ta anima Aruba pa simplifica e sistema di impuesto indirecto y sigui cu introduccion di impuesto riba balor añadi (iba), manera a anuncia anteriormente.
INVERSION
Pa haci economia mas resiliente y pa aumenta su capacidad pa genera entrada, ta necesario pa inverti. E suma presupuesta pa inversion den 2023, di AWG 20 miyon, ta demasiado abou. Inversion specifico den, por ehempel, infrastructura y proyecto di mitigacion y adaptacion na cambio climatico, ta contribui na crecemento economico sostenibel. CAft ta anima Aruba pa elabora un plan di inversion plurianual.
CUIDO DI SALUD Y SEGURIDAD SOCIAL
Aruba a tuma varios medida caba pa mehora e situacion financiero di e sistema social, manera reduci gasto di e lista positivo. En cambio, door di desaroyo demografico, gasto den cuido y den pensioen di behes lo aumenta mas lihe cu entrada y, si no cambia e maneho, pronto lo tin deficit. Pues, mester mira economisacion den cuido y seguridad social den e perspectiva plurianual aki. Ta necesario pa tuma medida awor pa garantisa cu e sistema social ta pagabel pa e generacionan futuro tambe. Den e contexto ey CAft ta anima Aruba pa yega na calculacion plurianual bon funda pa desaroyo di gasto den cuido di salud.
Entrante dia 1e. di februari 2023 a nombra Señora Lidewijde Ongering presidente di Colegio di supervision financiero di Aruba (CAft), Colegio di supervision financiero di Corsou y Sint Maarten (Cft), y Colegio di supervision financiero di Boneiro, Saba y Sint Eustatius (Cft). CAft a bishita Aruba dia 9 y 10 di februari y a hiba combersacion cu Gobernador, Minister di Finansa y Cultura, Minister di Turismo y Salud Publico, Minister di Transporte, Integridad, Naturalesa y Asunto di Hende Grandi, Conseho di Minister y Parlamento. Banda di esey, CAft a combersa tambe cu directiva di Aruba Trade & Industry Association (ATIA).
A.T.A: Turismo ‘stayover’ pa Aruba a crece cu mas di 25% den maart 2024
ORANJESTAD - Den e prome kwartaal di 2024, a conta cu cifranan prometedor pa turismo como e pilar di entrada primordial y di suma importancia pa economía di Aruba. Asina e oficina di turismo di Aruba ATA, a bisa den un comunicado. A.T.A. ta pone hopi enfasis riba e modelo di “High Value-Low Impact” cu ta para pa un balans entre cuater pilar cu ta e ‘Calidad di Bida di e residente’, ‘Calidad di Experiencia di e Bishitante’, Proteccion y Preservacion di Naturalesa & Medio Ambiente, y Contribucion Economico di e Sector Turistico’. E meta ta pa sigui mantene esfuerzonan den linea segun e balans menciona, y logra aumenta e entrada proporcionalmente mas cu e volumen cu nos destinacion ta ricibi. Capacidad di carga tambe ta sigui ricibi atencion di parti di A.T.A. di diferente manera.
Aruba ta den e top 5 pa loke ta e hafnan pa crucero den Caribe
ORANJESTAD – Aruba (y Corsou) ta figura den e top 5 di hafnan pa barconan crucero segun e portal cruisefever.net. Ta considera Aruba esun mas conoci di e islanan ABC, segun e portal. E haf di Aruba ta popular pa cruceronan cu itinerario di 8 pa 12 dia. E beachnan blanco, historia colonial, y e seguridad ta motibonan pa e escogencia aki. No descuida pa e oportunidad di compras tambe. Corsou tambe ta figura den e top 5 na di ultimo lugar, esta #5 compara cu Aruba cu ta na number 2. E edificionan colonial tambe y e ciudad Willemstad, e rifnan colorido y e cafenan interesante tabata motibo suficiente pa scohe e isla tambe. E prome pais den Caribe ta St Maarten, sigui pa Aruba, Grand Cayman, San Juan y Corsou.
SETAR a tene su Avigilon ALTA Launch Event cu enfoke riba e futuro di seguridad
CBS: Bestaansminimum a subi atrobe na Aruba debi na aumento di gasto di cuminda
ORANJESTAD - E bestaansminimum ta e nivel minimo di entrada cual ta wordo percibi cu ta necesario pa logra mantene un nivel di bida adecuado den un cierto pais. Usualmente e bestaansminimum ta wordo determina door di calcula e gasto di tur e recursonan esencial cu un adulto ta consumi den un luna of aña. Generalmente esaki ta wordo yama un indice basico di necesidad, y e ta varia segun e prijs di cuminda, paña, vivienda, transporte y otro articulonan den e “canasta”. Escalanan di ekivalencia ta wordo usa pa ahusta e nivel minimo di entrada percibi pa hogarnan di diferente tamaño y composicion. E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 16+) y un peso di 0.3 pa cada mucha (edad 0- 15 aña). E bestaansminimum ta basa riba cifranan di e rapport “Bestaansminimum 2010” y ta wordo actualisa mensualmente pa cu inflacion usando e CPI mensual. E unidad di referencia den e rapport aki ta di un hogar cu ta consisti di dos (2) adulto y dos (2) mucha (edad 0-15 aña).
WEB Aruba ta firma acuerdo cu Seven Seas Water Group pa construi planta SWRO-3
ORANJESTAD – Diaranson dia 17 di mei ultimo, WEB Aruba y Seven Seas Water Group (SSWG), un proveedor multinacional di ‘Water-as-a-Service® (WaaS®) solutions’, a firma un acuerdo Build-Own-Operate-Transfer (BOOT) cu un termino di traspaso di 10 aña. Seven Seas Water (Aruba) VBA lo construi un planta di SeaWater Reverse Osmosis (“SWRO”) cual lo contribui cu un minimo di 16.500 meter cubico di awa potabel pa dia. E asina yama SWRO-3 lo ta parti di WEB Aruba su plan di termino largo y su Water Road Map pa satisface demanda continuo di awa, manteniendo suministro confiabel. E planta nobo lo reemplasa e actual facilidad temporal di produccion di awa. SSWG a haya e contrato despues di un proceso di tendering y negociacion na 2023. Lo construi e planta SWRO-3 riba tereno existente di WEB y ta planea pa cuminsa opera pa medio 2026.
Banco Central ta mantene e tasa di reserva obligatorio na 22,0 porciento
ORANJESTAD - Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente. Durante e reunion di 26 di februari 2024, CMM a dicidi pa mantene e tasa di e reserva obligatorio na 22,0 porciento entrante 1 di maart 2024. Di e manera aki, e banconan comercial mester tene un balansa minimo na BCA cu ta igual na 22,0 porciento di e depositonan riba termino cortico di nan clientenan. E decision pa mantene e tasa di reserva obligatorio ta basa primordialmente riba e reservanan oficial cu ta relativamente serca di e limite minimo di e ARA, apesar cu tanto e reservanan oficial como e reservanan internacional a keda adecua y ta premira pa permanece asina durante 2024. Adicionalmente, likides excesivo di e sector bancario ta mustra un tendencia ascendente durante e ultimo lunanan. Finalmente ta considera prudente di mantene e reserva obligatorio na su nivel actual, mirando crecemento continuo di credito y su efecto potencial riba reservanan internacional. BCA ta sigui monitorea e desaroyo den e reservanan y likides excesivo y lo por dicidi di cambia e tasa di reserva obligatorio, si ta considera esaki necesario.
Follow NoticiaCla
