Alto Comisario ta preocupa: Cuerpo policial di Aruba falta 50% di su capacidad

MACUARIMA - Altocomisario di Polis, Sr. Ramon Arnhem ta preocupa! E ultimo añanan e capacidad di Cuerpo Policial Aruba a baha drasticamente. Esaki nifica falta hopi personal pa carga e cuerpo. Asina e alto comisario a informa diaranson anochi. Segun e comisario, na e momentonan aki KPA tin un scarcedad di 50% di su capacidad. E gran parti di scarcedad di personal ta e parti operacional cu ta 40%. E desaroyo serio aki tin consecuencia grandi pa e parti operacional y e bienestar di e Polisnan.

HOPI CANSA

“Mi a ripara cu mi hendenan ta cansa pero hopi cansa! Esaki pasobra nan ta traha mas cu 16 ora pa dia. Mi a tuma nota cu nos ta cabando cu nos polisnan pasobra nos ta exigi hopi di nan” tabata palabranan di altocomisario Arnhem cu su preocupacion pa cu e desaroyo serio aki. Mescos cu e seguridad di comunidad ta central. Altocomisario tin e coleganan bienestar como su prioridad. Ta solamente e momento cu nos polisnan ta bon di salud, físicamente y mentalmente nos por garantisa e seguridad en general.

Segun Arnhem ta importante pa re-evalua e tareanan cu KPA tin. “No pasobra cu nos kier pero pasobra nos no por otro. Hunto cu Minister di Husticia y Procurador Generaal nos lo defini cada tarea pa nos por mira kico por y kico no por y sin cu esaki ta bay a costo di e salud di cada colega di Cuerpo Policial di Aruba pasobra esaki ta inaceptabel!” “A pesar cu e problema di capacidad Cuerpo Policial Aruba lo sigui garantisa e seguridad di nos Pueblo.  Ami como Altocomisario ta hopi agradecido pa e esfuerso y dedicacion di cada colega pa haci cu Pais Aruba ta safe. Nos comunidad por sigui conta cu e sosten di Cuerpo Policial Aruba” e Alto comisario a finalisa bisando.